Tags-Mohabbat

mohabbat meñ ye kyā maqām aa rahe haiñ
ki manzil pe haiñ aur chale jā rahe haiñ

ye jo lahore se mohabbat hai
ye kisī aur se mohabbat hai

aur vo aur tum nahīñ shāyad
mujh ko jis aur se mohabbat hai

ye huuñ maiñ aur ye mirī tasvīr
dekh le ġhaur se mohabbat hai

bachpanā kam-sinī javānī aaj
tere har daur se mohabbat hai

ek tahzīb hai mujhe maqsūd
mujh ko ik daur se mohabbat hai

us kī har tarz mujh ko bhātī hai
us ke har taur se mohabbat hai

be-kaif javānī hai be-dard zamāna hai
nākām-e-mohabbat kā itnā hī fasāna hai

āġhāz-e-mohabbat se anjām-e-mohabbat tak
''ik aag kā dariyā hai aur Duub ke jaanā hai''

be-shak hai nā-ḳhudā kī mohabbat bhī un ke saath
'anjum' ḳhudā kā naam jo lete haiñ pyaar se

koshish to bahut kī ham ne magar paayā na ġham-e-hastī se mafar
vīrānī-e-dil jab had se baḌhī ghabrā ke mohabbat kar baiThe

har chiiz nahīñ hai markaz par ik zarra idhar ik zarra udhar
nafrat se na dekho dushman ko shāyad vo mohabbat kar baiThe

rūdād-e-mohabbat sun sun kar ḳhud husn ko bhī niiñd aane lagī
ab aur kahāñ se laa.eñ dil ab aur kahānī kyā kahiye

hai mohabbat aisī bañdhī girah jo na ek haath se khul sake
koī ahd toḌe kare daġhā mirā farz hai ki vafā karūñ

nazar ke paas rah kar bhī pahuñch se duur ho jaanā
mohabbat meñ ise kahte haiñ ham majbūr ho jaanā

mohabbat kā hamārā dā.era bas ittibā.a tak hai
hameñ zebā nahīñ hai sarmad-o-mansūr ho jaanā

na rahā zabt kā yaarā 'anjum'
na chhupī ham se mohabbat hī to hai

yak-ba-yak tark na karnā thā mohabbat mujh se
ḳhair jis tarah se aatā thā vo aatā jaatā

mat maañg duā.eñ jab mohabbat
terā merā muāmla hai

karte raheñge tum se mohabbat bhī vafā bhī
go tum ko mohabbat na vafā yaad rahegī