Tags-Mohabbat

jaan se baḌh kar dil hai pyārā dil se ziyāda jaan aziiz
dard-e-mohabbat kā ik tohfa kis kis ko irsāl kareñ

ḳhaam hai merī mohabbat varna ye aalam na ho
vo ḳhalish bhī kyā ḳhalish hai dil meñ jo paiham na ho

kyā kareñ jaan na de deñ jo mohabbat vaale
har adā husn kī paiġhām-e-qazā hai ai dost

mohabbat kī qasam vo mujh se lenā chāhtā thā
so in hāthoñ pe lā ke 'mīr' kā dīvān rakkhā

tanhā tumhīñ ho jin kī mohabbat kā aasrā
un bekasoñ ke dil kī duā ho ga.e ho tum

use mohabbat hai ham se lekin kabhī zabāñ se kahā nahīñ hai
nigāh paḌhne meñ ham haiñ māhir use ye shāyad patā nahīñ hai

jhelīñ bahut haiñ rāh-e-mohabbat meñ saḳhtiyāñ
ye soch kar ki ham ko bhī apnā mile koī

jo dil pe guzrīñ mohabbat ke ḳhaas lamhoñ meñ
hudūd-e-sharh-o-bayyañ meñ vo vāqi.āt nahīñ

ġham-e-davām-e-mohabbat hai tishna-e-ma.anī
fanā ke ba.ad agar manzil-e-hayāt nahīñ

jis ne mirī soī huī duniyā ko jagāyā
aa jaatī hai ab bhī vo mohabbat kī sadā yaad

ik lafz-e-mohabbat kā adnā ye fasānā hai
simTe to dil-e-āshiq phaile to zamāna hai

rishta-e-rasm-e-mohabbat mat toḌ
toḌ kar dil ko qayāmat mat toḌ

na duniyā kā huuñ maiñ na kuchh fikr diiñ kā
mohabbat ne rakkhā na mujh ko kahīñ kā

mil hī gayā hai jab to mohabbat se baat kar
varna ye dhyān rakh mire muñh meñ zabāñ bhī hai

merī fitrat hī meñ shāmil hai mohabbat karnā
aur fitrat kabhī tabdīl nahīñ ho saktī

na mohabbat hai diloñ meñ na hayā āñkhoñ meñ
ye sanam tū ne banā.e haiñ ḳhudāyā kaise

kabhī jab Dagmagā.ī zindagī kī naav tūfāñ meñ
adā-e-mauj par maiñ ne mohabbat kī ġhazal kah dī

mohabbat kyā baḌhī hai vahm bāham baḌhte jaate haiñ
ham un ko āzmāte haiñ vo ham ko āzmāte haiñ

kahāñ tak imtihāñ kab tak mohabbat āzmāoge
unhīñ bātoñ se dil ahl-e-vafā ke chhūT jaate haiñ

ajiib raat utārī ga.ī mohabbat par
hamārī āñkheñ tumhāre charāġh jalte haiñ