Tags-Mohabbat

dil jo rotā hai use gaate hue nikle 'nadīm'
log is dard-e-mohabbat ko adab kahte haiñ

phailā kiye dariyā-e-mohabbat ke kināre
un jhiil sī āñkhoñ meñ koī chiiz nihāñ thī

tābānī-e-husn-e-ālam hai garmi-e-mohabbat ke dam se
parvāne agar mahfil meñ na hoñ phir sham.a kā jalnā mushkil hai

ik shahanshāh ne banvā ke hasīñ tāj-mahal
saarī duniyā ko mohabbat kī nishānī dī hai

mujhe ye Dar hai ba-īñ vasf-e-ehtirām-e-vafā
na terī chashm-e-mohabbat kahīñ badalne lage

ye dāġh-e-sajda to nañg-e-jabīñ hai ai zāhid
agar na soz-e-mohabbat se dil pighalne lage

na pūchh kis nigah-e-ḳhās kā tasarruf hai
qadam jo rāh-e-mohabbat meñ ḳhud sambhalne lage

ḳhudāyā hind par terī ināyat ho ināyat ho
barādar ko barādar se mohabbat ho mohabbat ho

haqīqat meñ vahī hai bahra-var ishq-e-haqīqī se
urūs-e-mulk se jis ko mohabbat ho mohabbat ho

gar unheñ hai apnī sūrat par ghamanD
ham ko hai apnī mohabbat par ghamanD

usī purānī kahānī meñ saañs lete haiñ
vahī purānī mohabbat hai ya.anī ham abhī haiñ

kisī ne us ko mohabbat meñ dard baḳhshā thā
vo bevafā.ī mujhe moḌ dene aayā thā

mohabbat ḳhvāb ho jaa.e
havā ke saath kho jaa.e

kisī ko apnī barbādī kā baa.is kyā batā.eñ ham
mohabbat hai burī shai jāntā hai har bashar itnā

ushshāq ke dil nāzuk us shoḳh kī ḳhū nāzuk
nāzuk isī nisbat se hai kār-e-mohabbat bhī

har-chand hai dil shaidā hurriyat-e-kāmil kā
manzūr-e-duā lekin hai qaid-e-mohabbat bhī

mohabbat kā adnā tasarruf hai 'hirmāñ'
jahāñ maiñ nahīñ huuñ vahāñ dekhtā huuñ

kaisī mohabbat hai
likhā qismat meñ jis ke

bharā hai shīsha-e-dil ko na.ī mohabbat se
ḳhudā kā ghar thā jahāñ vaañ sharāb-ḳhāna huā

kahāñ un ke diloñ meñ vo ḳhalish soz-e-mohabbat kī
tire tīr-e-nazar se jo rahe nā-āshnā ho kar