Tags-Mohabbat

ai sanam jis ne tujhe chāñd sī sūrat dī hai
usī allāh ne mujh ko bhī mohabbat dī hai

tū jān-e-mohabbat hai magar terī taraf bhī
ik ḳhvāhish-e-tash.hīr-e-vafā le ga.ī ham ko

daar mil hī ga.ī mansūr ko vaa.iz varna
kaun duniyā meñ mohabbat kā sila detā hai

ik shajar aisā mohabbat kā lagāyā jaa.e
jis kā ham-sā.e ke āñgan meñ bhī saayā jaa.e

ham vo barbād-e-mohabbat haiñ ḳhudā shāhid hai
aag dil meñ jo lagī ho to bujhāte bhī nahīñ

lagā.ī dil meñ kuchh aisī tū ne ye ātish-e-sozish-e-mohabbat
bhaḌak rahī hai ye utnā paiham ham us ko jitnā bujhā rahe haiñ

haiñ rahravān-e-rah-e-mohabbat nirālī rasmeñ nirālī fitrat
jahāñ luTā kārvān-e-ulfat vahīñ pe manzil banā rahe haiñ

na ham ko sher-o-suḳhan se matlab na ishrat-e-anjuman se matlab
kisī ko 'iqbāl' dāstān-e-ġham-e-mohabbat sunā rahe haiñ

ye rasm-e-tark-e-mohabbat bhī ham adā karte
tere baġhair magar zindagī ko kyā karte

kuchh ḳhvāb haiñ parda-e-anvār magar un kī sahar gum
jis aag se uThtā hai mohabbat kā ḳhamīr us ke sharar gum

maiñ tujh se ramz-e-mohabbat kahūñ to kaise kahūñ
maiñ be-qarār huuñ aur tujh ko kuchh qarār sā hai

vo mirā yār-e-tarah-dār ki ḳhush-fahm bhī hai
koī dhoka hī na de jaa.e mohabbat meñ use

din kā malāl shaam kī vahshat kahāñ se laa.eñ
zar-zadgān-e-shahr mohabbat kahāñ se laa.eñ

ham-nafas dil dhaḌakte haiñ jab tak
kārobār-e-mohabbat javāñ hai

mohabbat adāvat vafā be-ruḳhī
kirā.e ke ghar the badalte rahe

yūsuf-e-misr-e-mohabbat kaisā arzāñ bik gayā
naqd-e-dil qīmat huī ik bosa bai.āna huā

ai dekhne vaalo mujhe hañs hañs ke na dekho
tum ko bhī mohabbat kahīñ mujh sā na banā de

shāyad hai vahī merī mohabbat kā hayūlā
ik saaya jo chup-chāp darīche meñ khaḌā hai

mohabbat bhī zarūrat pesh-bīnī bhī zarūrat hai
maiñ kār-e-dostī meñ sab ḳhasāre dekh letā huuñ

chehroñ ko to paḌhte haiñ mohabbat nahīñ karte
kyā log haiñ zaḳhmoñ kī himāyat nahīñ karte