Tags-Mohabbat

dāman-e-sāgān kū-e-mohabbat se taar taar
chehra ḳharāsh-e-dast-e-junūñ se ḳharāb thā

āġhāz-e-mohabbat meñ 'ājiz' ruktī na thī mauj-e-ashk-e-ravāñ
anjām ab in ḳhushk āñkhoñ se ik ashk nikalnā mushkil hai

baat karte haiñ mohabbat kī jahāñ baste haiñ log
maiñ kahāñ rahtā huuñ kis des mirā ghar chhūTā

ham abhī tak haiñ giraftār-e-mohabbat yaaro
Thokareñ khā ke sunā thā ki sambhal jaate haiñ

tirī nigāh-e-mohabbat-navāz hī kī qasam
ki aaj tak to hameñ tujh sā dūsrā na milā

subūt hai ye mohabbat kī sāda-lauhī kā
jab us ne va.ada kiyā ham ne e'tibār kiyā

kuchh mohabbat ko na thā chain se rakhnā manzūr
aur kuchh un kī ināyāt ne jiine na diyā

maiñ na kahtā thā ai 'safī' tujh ko
kab mohabbat hai raas rahne de

mohabbat muñh pe karnā aur dil meñ bevafā.ī hai
ye ā.īna yahāñ kahtā hai kaisī āshnā.ī hai

nahīñ ye abr-o-bārāñ 'soz' ke ahvāl ko sun kar
falak kī bhī mohabbat se ye ab chhātī bhar aa.ī hai

maiñ hairat o hasrat kā maarā ḳhāmosh khaḌā huuñ sāhil par
dariyā-e-mohabbat kahtā hai aa kuchh bhī nahīñ pāyāb haiñ ham

hazār chāheñ na chūTegī ham se ye duniyā
yahīñ raheñge mohabbat kī be-kasī ke liye

miltī hai zindagī meñ mohabbat kabhī kabhī
hotī hai dilbaroñ kī ināyat kabhī kabhī

na jaane kaisī mohabbat meñ qaid ho ga.ī huuñ
maiñ roz dekhtī huuñ dā.era hathelī kā

un ko mohabbat hī meñ shak paḌ gayā
Dar se jo shikva na adū kā kiyā

maiñ mohabbat ke masā.il ko samajh saktā huuñ
sāmne mere ye da.avā na kisī ko hogā

mohabbat aag hai aisī jo paanī se nahīñ bujhtī
zamāne ne abas sho.ale ko muTThī meñ dabāyā thā

shā.ir kī āvāra tabī.at asl meñ hai taz.īn-e-mohabbat
nāseh mushfiq tum sab kuchh ho sirf yahī idrāk nahīñ hai

'nizām' ab uqda-e-dil kyuuñ na hal hoñ
mohabbat hai tujhe mushkil-kushā se

atā kiyā jise tū ne ġham-e-mohabbat-e-dost
vo dil asīr-e-ġham-e-rozgār ho na sakā