Tags-Mohabbat

mohabbat ko kahāñ tāb-e-nazāra
javānī aap hī sharmā rahī hai

kaho to aaj batā deñ tumheñ haqīqat bhī
ki zindagī se rahī hai hameñ mohabbat bhī

kaun sī jā hai asīrān-e-mohabbat ke liye
kis liye jaa.eñ kahīñ vābastagān-e-kū-e-dost

huuñ rang-e-mohabbat se vāqif huuñ soz-e-mohabbat se vāqif
gulzār meñ bulbul maiñ thā kabhī mahfil meñ kabhī parvāna thā

dekhe koī nāseh kī jo hālat hai ki ham to
us but kī mohabbat meñ bahar-hāl bañdhe the

magar ab aisī bhī koī andher-nagrī nahīñ
ye Thiik hai ki mohabbat kā qaht paḌ gayā hai

atā huī hai mohabbat kī saltanat jab se
maiñ shahr-e-dīda-e-ḳhūñ-nāb se nikal aayā

jis ne tirī āñkhoñ meñ sharārat nahīñ dekhī
vo laakh kahe us ne mohabbat nahīñ dekhī

ḳhud se itnī bhī adāvat to nahīñ kar saktā
ab koī mujh se mohabbat to nahīñ kar saktā

kiyā ġhārat mohabbat kī faqat ek tez bārish ne
utar kar dil se sab rañg-e-tamannā duur tak aayā

mohabbat hai azal ke din se shāmil merī fitrat meñ
bilā tafrīq shaiḳh o barhaman se ishq hai mujh ko

pata detā hai gumrāhī-e-rahgīr-e-mohabbat kā
bichhaḌnā aur bichhaḌ kar qāfile se duur ho jaanā

har adāvat kī ibtidā hai ishq
ki mohabbat kī intihā hai ishq

haa.e barbād kiyā hai kyā kyā
raas ham ko na mohabbat aa.ī

terī ḳhātir se jahāñ ko chhoḌā
phir bhī tujh ko na mohabbat aa.ī

hasīnoñ kī mohabbat kā na kar kuchh e'tibār ai dil
ye zālim kis ke hote haiñ ye kis ko yaad karte haiñ

rafta rafta ho rahā hai vo sitamgar mehrbāñ
kaun kahtā hai mohabbat meñ asar hotā nahīñ

dil meñ ab kuchh bhī nahīñ un kī mohabbat ke sivā
sab fasāne haiñ haqīqat meñ haqīqat ke sivā

aap daulat ke tarāzū meñ diloñ ko tauleñ
ham mohabbat se mohabbat kā sila dete haiñ

bīmār-e-mohabbat kī ab hai ye duā har-dam
phir shaam na ho jis kī aisī sahar aa jaa.e