Tags-Mohabbat

phir bhī tere liye āvāra-e-ġhurbat hai 'ravish'
garche shāyān-e-mohabbat hai na milnā terā

mohabbat meñ kaThin raste bahut āsān lagte the
pahāḌoñ par suhulat se chaḌhā karte the ham donoñ

is mohabbat meñ hadaf koī bhī ban saktā hai
is meñ rakkhā nahīñ jaatā hai nishāne kā ḳhayāl

zamīñ pe dil kī mohabbat javān hotī rahī
vafā kī dhuup pe bādal jafā ke chhāne tak

mohabbat meñ kare kyā kuchh kisī se ho nahīñ saktā
mirā marnā bhī to merī ḳhushī se ho nahīñ saktā

toḌ kar badnām tum dil ko mire ho jāoge
is meñ poshīda mohabbat kā tumhārī raaz hai

is daur meñ mafhūm-e-mohabbat hai tijārat
is daur meñ hotī hai vafā aur tarah kī

mohabbat ḳhalvat-e-dil meñ utar jaatī hai chupke se
ye aisā hai maraz yaaro kabhī kah kar nahīñ aatā

aur vo merī mohabbat pe kabhī hañs na sakeñ
maiñ bhī be-rañg nigāhoñ kī shikāyat na karūñ

na hī tirchhe na hī sīdhe na assī ke na navve ke
ki miqyās-e-mohabbat meñ na.e kuchh zāviye bhī haiñ

har-chand andesha-e-jāñ hai bahut lekin is kār-e-mohabbat meñ
koī pal bekār nahīñ jaatā koī baat fuzūl nahīñ hotī

mohabbat meñ dil-saḳhtiyāñ aur bhī haiñ
uThāne ko sañg-e-girāñ aur bhī haiñ

pesh kyā karte unheñ jām-e-mohabbat 'ārif'
umr ke saath ye mausam bhī suhāne badle

saḳht jān-levā hai sādgī mohabbat kī
zahr kī kasauTī par zindagī ko kastī hai

ik nigāh-e-mohabbat kī taḳhmīr meñ
sab simaT kar jahān-e-ḳharāb aa gayā

nigāh-e-dil-doz kī duhā.ī jamāl-e-jāñ-soz kī duhā.ī
rah-e-mohabbat meñ ġham ne luuTā shakeb o sabr o qarār merā

natā.ej jab sar-e-mahshar mileñge
mohabbat ke alag number mileñge

yā-rab kisī ke rāz-e-mohabbat kī ḳhair ho
dast-e-junūñ rahe na rahe āstīñ rahe

kis dard se kisī ne kahā aaj bazm meñ
achchhā ye hai vo nañg-e-mohabbat yahīñ rahe

sar-dādgān-e-ishq-o-mohabbat kī kyā kamī
qātil kī teġh tez ḳhudā kī zamīñ rahe