Tags-Mohabbat

azmat-e-ishq hai pābandī-e-zabt-e-furqat
ya.anī tauhīn-e-mohabbat haiñ hamāre aañsū

mohabbat hai zarūr un se magar merī matānat ko
na jaane kyuuñ ye nisbat bhī burī ma.alūm hotī hai

'josh' uThtī hai dushman kī nazar jab mirī jānib
khultā hai mohabbat kā darīchā mire aage

hameñ bāzār ne Thukrāyā to ghar lauTe haiñ
ik mohabbat to bahr-e-hāl nibhānī thī hameñ

ye kyā qātil haiñ, pahle qatl karte haiñ mohabbat kā
phir us ke ba.ad iz.hār-e-pashemānī bhī karte haiñ

ishq-e-butāñ se haath uThā apnī ḳhudī meñ Duub jā
naqsh o nigār-e-dair meñ ḳhūn-e-jigar na kar talaf

misl-e-kalīm ho agar mārka aazmā koī
ab bhī daraḳht-e-tūr se aatī hai bāñg-e-lā-taḳhaf

haq-parastī bhī ajab kār-e-mohabbat hai jahāñ
ik qadam had se guzar jaao to bātil ho jaao

duniyā-e-mohabbat meñ ham se har apnā parāyā chhūT gayā
ab kyā hai jis par naaz kareñ ik dil thā vo bhī TuuT gayā

ulfat meñ tirī ai but-e-be-mehr-o-mohabbat
aayā hameñ ik haath se taalī kā bajānā

mohabbat meñ maqām aayā hai kaisā
ayaañ hone ko hai rāz-e-nihāñ tak

is meñ bhī rābta-e-ḳhās kī miltī hai jhalak
ḳhair iqrār-e-mohabbat na ho inkār to hai

ishq o mohabbat kyā hote haiñ kyā samjhā.ūñ vaa.iz ko
bhaiñs ke aage biin bajānā mere bas kī baat nahīñ

na.e sire se mohabbat kī aarzū thī magar
na.e sire se mohabbat nahīñ huī mujh se

nigāhoñ kā markaz banā jā rahā huuñ
mohabbat ke hāthoñ luTā jā rahā huuñ

kidhar hai tū ai ġhairat-e-husn ḳhud meñ
mohabbat ke hāthoñ bikā jā rahā huuñ

maiñ yuuñ to ek mohabbat ke qā.elīn meñ thā
tujhe milā to rahā hī nahīñ gayā mire dost

merī ġhazleñ haiñ mohabbat ke sahīfe 'anjum'
paḌhne vāloñ ko tilāvat kā mazā aa.egā

kis tarah apnī mohabbat kī maiñ takmīl karūñ
ġham-e-hastī bhī to shāmil hai ġham-e-yār ke saath

bāñdh rakkhā hai hameñ jis ne abhī tak jānāñ
ham mohabbat kī vo zanjīr sambhāle hue haiñ