Tags-Mohabbat

sharīk vo bhī rahā kāvish-e-mohabbat meñ
shurūa us ne kiyā thā tamām maiñ ne kiyā

hogā kisī dīvār ke saa.e meñ paḌā 'mīr'
kyā kaam mohabbat se us ārām-talab ko

mohabbat meñ aayā hai tanhā abhī rañg
badalne lagī hai magar zindagī rañg

aisā nahīñ ki un se mohabbat na ho magar
pahle sā josh pahle sī shiddat nahīñ rahī

ham to kahte haiñ mohabbat meñ maza hai hī nahīñ
aap kahte haiñ to phir maan liyā jaatā hai

ruuTh saktī huuñ kahāñ us se mohabbat hai mujhe
aur agar ruuTh ga.ī mujh ko manāne aa.e

ḳhāmosh ho kyuuñ dard-e-mohabbat ke gavāho
da.ave ko nibāho mire naalo mirī aaho

āġhāz-e-mohabbat ke maze ne kiyā ġhāfil
ab tak na the ham us ke bad-anjām se vāqif

bahut saste chhuTe ai maut bāzār-e-mohabbat meñ
ye saudā vo hai jis meñ kyā kaheñ kyā kyā jhamelā thā

tumhārā husn ho yā merī shā.erī un ko
amar kiyā hai mohabbat kī ātmāoñ ne

mohabbat kī haqīqat kam nahīñ asrār-e-hastī se
samajh letā huuñ lekin mujh se samjhā.ī nahīñ jaatī

aaj havas kā naam mohabbat aur mohabbat vaj.h-e-kulfat
ḳhulq hai mahñgā apne vatan meñ pyaar hai arzāñ apne vatan meñ

burā.ī bhalā.ī kī sūrat huī
mohabbat meñ sab kuchh ravā ho gayā

vo nā-murād mohabbat huuñ jis ke dāman meñ
sarishk-e-dīda-e-tar ke sivā kuchh aur nahīñ

hai aaj bhī nigāh-e-mohabbat kī aarzū
par aisī ik nigāh kī qīmat kahāñ se laa.eñ

maiñ kaise tark kar duuñ ab ki ye kār-e-mohabbat
kisī ke hukm kī ta.amīl hotā jā rahā hai

tai kis se ho vādī-e-mohabbat
chalte hue paañv TūTte haiñ

tum ho mahrūm to tum sabr hī pā jaao 'suhail'
jis ne paa.ī hai mohabbat use tum paane do

jo āshnā nahīñ haiñ mohabbat kī aañch se
kyuuñ aas un se phir bhī lagā.e hue haiñ ham

maiñ jo royā un kī āñkhoñ meñ bhī aañsū aa ga.e
husn kī fitrat meñ shāmil hai mohabbat kā mizāj