Tags-Mohabbat

agar ahd-e-vafā se tū bhī phir jaa.e mohabbat meñ
'hijāb' us shoḳh ko mālūm ho jaa.e daġhā denā

mohabbat zindagī hai zindagī kā naam mastī hai
agar mastī na ho to zindagī miTTī se sastī hai

ugaao duur tak ai dostoñ fasleñ mohabbat kī
mohabbat jis jagah hotī nahīñ la.anat barastī hai

ġharq-e-dariyā-e-mohabbat kī nahīñ miltī laash
varna Duubā huā nikle hai sunā tīsre din

vo kahāñ haiñ hameñ nahīñ ma.alūm
jin ko insān se mohabbat hai

the dūsre bhī terī mohabbat ke ās-pās
dil ko magar sukūn milā kam bahut hī kam

is dil ke saare ḳhvāb mohabbat ke sab gulāb
ik sher se khile kabhī ik nazm se mile

mohabbat merī behad ḳhud-ġharaz hai
tujhe sab se chhupānā chāhtā huuñ

sameT lī haiñ mohabbat ne saarī parvāzeñ
dil-o-dimāġh meñ kaisā ye intishār huā

patthar ke ḳhudā patthar ke sanam patthar ke hī insāñ paa.e haiñ
tum shahr-e-mohabbat kahte ho ham jaan bachā kar aa.e haiñ

hoñToñ pe tabassum halkā sā āñkhoñ meñ namī sī hai 'fākir'
ham ahl-e-mohabbat par aksar aise bhī zamāne aa.e haiñ

ek ek kar ke huī bazm-e-mohabbat ḳhālī
nazar aatā nahīñ ab yaar vafādār koī

dil agar kuchh maañg lene kī ijāzat māñgtā
ye mohabbat-zād tajdīd-e-mohabbat māñgtā

dost to vo bahut purānī thī
haañ mohabbat na.ī na.ī huī hai

chāhā tujhe to ḳhud se mohabbat sī ho ga.ī
khone ke baad mil ga.ī apnī ḳhabar mujhe

vo ibtidā-e-mohabbat ke pahle lamhe ko
banā ke āḳhirī pal jā.egā ḳhabar nahīñ thī

ye aksar talḳh-kāmī sī rahī kyā
mohabbat zak uThā kar aa.ī thī kyā

mohabbat meñ hameñ pās-e-anā thā
badan kī ishtihā sādiq na thī kyā

nahīñ hai ab mujhe tum par bharosā
tumheñ mujh se mohabbat ho ga.ī kyā

ham ne to ek parī-vash se mohabbat kī hai
log kahte haiñ mohabbat nahīñ kī jā saktī