Tags-Mohabbat

riyā-kārī hai kyoñ sheva hamāre dostoñ kā ab
mohabbat ke yahāñ gauhar dikhā.ī kyoñ nahīñ dete

āñkheñ haiñ ki paiġhām mohabbat vaale
bikhrī haiñ laTeñ ki niiñd meñ haiñ kaale

mujhe bahut tez dhuup darkār hai mohabbat ke is safar meñ
kabhī kahīñ sar pe saaya karne koī ghanerā shajar na aa.e

tum kyā jaano pyaar mohabbat ishq nibhānā kyā hotā hai
tum kyā jaano rasta takte umr bitānā kyā hotā hai

'aish' āġhāz-e-mohabbat hī meñ thā dil ko kahā
dekh hotā hai bure kaam kā anjām burā

ham tasavvuf ke hue aalim tasavvuf chhoḌ kar
dil mohabbat se huā ḳhālī to dānish aa ga.ī

be-kashish hai vo nigāh-e-sad-lutf
ik mohabbat kī kamī ho jaise

kyā baat hai ai talḳhī-e-āzār-e-mohabbat
fihrist-e-shahīdāñ meñ mirā naam nahīñ hai

ibtidā kitnī mohabbat kī hasīñ hotī hai
zindagī ḳhvāb pe mā.il-ba-yaqīñ hotī hai

asl īmāñ hai mohabbat jise qismat se mile
kaun kahtā hai ki ye dushman-e-dīñ hotī hai

'ashk' āñkhoñ meñ haiñ gar ahl-e-mohabbat kī to kyā
choT lagtī hai jahāñ Tiis vahīñ hotī hai

maiñ samajh baiThī jise apnī mohabbat kā ḳhudā
vo farishta hai na insān ḳhudā ḳhair kare

ek patthar-sifat insāñ se mohabbat kar ke
ai ġham-e-dil tujhe ījād kiyā hai maiñ ne

yuuñ khilāyā hai tire dil meñ mohabbat kā gulāb
dasht aise koī ābād kiyā hai maiñ ne

ik ibādat se kahāñ kam hai mohabbat merī
tujh ko aayat kī tarah yaad kiyā hai maiñ ne

vafā iḳhlās qurbānī mohabbat
ab in lafzoñ kā pīchhā kyuuñ kareñ ham

kahīñ rāz-e-dil ab ayaañ ho na jaa.e
nigāh-e-mohabbat zabāñ ho na jaa.e

kyā kaheñ mohabbat kā raaz kam-nigāhoñ se
ham ne dil banā.e haiñ āñsuoñ se aahoñ se

saare mas.ale hal haiñ maslak-e-mohabbat meñ
un kī raah miltī hai be-shumār rāhoñ se

shāyad yahī kitāb-e-mohabbat ho lā-javāb
merī vafā ke saath hai terī jafā bahut