Tags-Mohabbat

dhuāñ detā hai dāmān-e-mohabbat
in āñkhoñ se koī aañsū girā hai

jab se dekhā hai mohabbat ko adāvat karte
tab se hoñToñ pe mire haañ hai na huuñ hai yuuñ hai

rivāyateñ bhī ajab haiñ baḌī mohabbat kī
jo dil ke paas ho āñkhoñ se duur hotā hai

āġhāz-e-mohabbat meñ 'ājiz' ruktī na thī mauj-e-ashk-e-ravāñ
anjām ab in ḳhushk āñkhoñ se ik ashk nikalnā mushkil hai

kabhī hai shabnam kabhī sharārā falak se TuuTā to ek taarā
ġham-e-mohabbat ke rāzdāro ye gauhar-e-ābdār kyā hai

duniyā-e-mohabbat meñ charāġhāñ na milegā
palkoñ pe agar ashk hamāre na raheñge

ham haiñ bīmār-e-mohabbat ye duā māñgte haiñ
misl-e-iksīr na duniyā meñ davā paidā ho

hijr hogā na koī hijr kā nauha hogā
baaz aate haiñ mohabbat se jo hogā hogā

apne bismil kā sar hai zaanū par
kis mohabbat se jaan lete haiñ

ai bachcho ai hañsne vaalo tārīḳh-e-mohabbat paḌh Daalo
dil vaale ke dil par qaid nahīñ har umr meñ Thokar khātā hai

ham se vo ajnabī aur un se the anjāne ham
tā-abad yuuñ hī mohabbat ye farāmosh rahī

ḳhāmoshī pe ilzām lagāyā na karo
be-vaj.h mohabbat bhī jatāyā na karo

sambhal kar paañv rakhnā vādī-e-ishq-o-mohabbat meñ
yahāñ jo sair ko aatā hai bach kar kam nikaltā hai

asar kartā agar naala to patthar mom ho jaatā
abhī jazb-e-mohabbat hī hamārā ḳhaam hai shāyad

koī bhī saath kahāñ thā rah-e-mohabbat meñ
ye aur baat ki ab ho gayā akelā maiñ

hamāre dil meñ dhaḌaktā hai naam us kā abhī
hai ye shurū-e-mohabbat tamām thoḌī hai

koī mausam bhī sazā-vār-e-mohabbat nahīñ ab
zard pattoñ ko havāoñ se shikāyat nahīñ ab

ai rūh-e-avadh terī mohabbat ke nisār
maiñ aur mirā fan terī azmat ke nisār

haath milāo ahl-e-mohabbat
nafrat kaafī tāqat-var hai

kahīñ paḌe na mohabbat kī maar holī meñ
adā se prem karo dil se pyaar holī meñ