Tags-Mohabbat

kyuuñ bahr-e-mohabbat meñ hai ḳhauf-e-ajal 'nātiq'
marne ko to marte haiñ dariyā ke kināre bhī

martaba chāhtā huuñ kuchh maiñ bhī
ai mohabbat tabāh kar mujh ko

mohabbat aur ḳhushbū kā nagar taqsīm ho jaa.e
kahīñ aisā na ho ghar kā shajar taqsīm ho jaa.e

kabhī bhī aag kī fasleñ yahāñ par ug nahīñ saktīñ
mohabbat saare aalam meñ agar taqsīm ho jaa.e

tamām umr pashemāniyoñ meñ biit ga.ī
ba-qadr-e-shauq mohabbat ke naaz uThā na sake

maiñ rizq kī āvāz pe labbaik kahūñgā
haañ mujh ko zamīnoñ se mohabbat nahīñ koī

TuuTā tilism-e-ahd-e-mohabbat kuchh is tarah
phir aarzū kī sham.a firozāñ na kar sake

kis darja dil-shikan the mohabbat ke hādse
ham zindagī meñ phir koī armāñ na kar sake

kyā ḳhabar thī ye mohabbat kā natīja hogā
rāt-din dard-e-judā.ī meñ taḌapnā hogā

na mohabbat ko jānte ho tum
na muravvat ko dekhtā huuñ maiñ

mohabbat kā mujhe da.avā hī kyā hai
chalo jaane bhī do jhagḌā hī kyā hai

mohabbat meñ jiye yā koī mar jaa.e
kasī kī aap ko parvā hī kyā hai

munāsib hai yahī 'rif.at' ki baaz aao mohabbat se
hai lāzim jaan kā ḳhatra kisī se dil lagāne meñ

sambhal sambhal ke mire dil ko toḌne vaale
tirī jafā meñ mohabbat kī chāshnī to milī

raas aatī hī nahīñ jab pyaar kī shiddat mujhe
ik kamī apnī mohabbat meñ kahīñ rakkhūñgā maiñ

mahak rahī hai zamīñ chāñdnī ke phūloñ se
ḳhudā kisī kī mohabbat pe muskurāyā hai

kabhī na husn-o-mohabbat meñ ban sakī 'vāhid'
vo apne naaz meñ ham apne bāñkpan meñ rahe

mirī mohabbat meñ saarī duniyā ko ik khilaunā banā diyā hai
ye zindagī ban ga.ī hai maañ aur mujh ko bachcha banā diyā hai

husn ne maan liyā qābil-e-tāzīr mujhe
nazar aa.ī hai mohabbat kī ye taqsīr mujhe

chand logoñ kī mohabbat bhī ġhanīmat hai miyāñ
shahr kā shahr hamārā to nahīñ ho saktā