Tags-Mohabbat

'naḳhshab' miTāyā jis ne vafāoñ kī aaḌ meñ
us bevafā se phir bhī mohabbat rahī mujhe

nashāt-e-dahr abhī dard se badal jaa.e
milā hai zabt-e-mohabbat kā iḳhtiyār mujhe

mujh se kab us ko mohabbat thī magar mere ba.ad
us ne jis shaḳhs ko chāhā vo mire jaisā thā

jahāñ se chhoḌ rahe ho mujhe añdhere meñ
vahīñ se rāh-e-mohabbat nikal to saktī hai

koī pūchhe ki ishq kyā shai hai
kyā batā.eñ ki hai mohabbat kyā

ab jaam nigāhoñ ke nasha kyuuñ nahīñ dete
ab bol mohabbat ke mazā kyuuñ nahīñ dete

jī jaltā hai aah ke jhoñko
sham-e-mohabbat ko gul kar do

zabānoñ ke ras meñ ye kaisī mahak hai
ye bosa ki jis se mohabbat kī sahbā kī uḌtī hai ḳhushbū

mil ke baiTheñge ḳhushī aur ġhamī meñ saare
jaarī rakheñge mohabbat kī ye ḳhū gaañv meñ

dil meñ ab rahm nahīñ mehr-o-mohabbat bhī nahīñ
vo bhī insāñ thā magar sāhab-e-zar hone tak

mohabbat rañg de jaatī hai jab dil dil se miltā hai
magar mushkil to ye hai dil baḌī mushkil se miltā hai

ye majbūrī, mohabbat bhiik jaisī bhī gavārā hai
kabhī din raat ko terī zarūrat aisī hotī hai

vasl kī to kabhī furqat kī ġhazal likhte haiñ
ham to shā.ir haiñ mohabbat kī ġhazal likhte haiñ

bayān-e-dard-e-mohabbat jo baar baar na ho
koī naqāb tire ruḳh kī parda-dār na ho

ab aks-e-mohabbat bhī huā hai kamyāb
is daur meñ hai kaisī girānī likhnā

ye kyā ki hamīñ marte raheñ lutf to jab hai
tāsīr-e-mohabbat jo idhar ho to udhar bhī

milā mohabbat kā rog jis ko 'qatīl' kahte haiñ log jis ko
vahī to dīvāna kar ke terī galī kā pherā palaT gayā hai

ek ham hī nahīñ sar meñ liye saudā-e-vafā
aur bhī kitne mohabbat ke gumāñ meñ hoñge

ye kah ke ho ga.e thoḌe se bevafā ham bhī
hamesha kaun mohabbat meñ devdās rahe

merī har ik baat qānūn-e-mohabbat hai magar
ai safī' maiñ shā.irī karne se jhūTā ho gayā