Tags-Mohabbat

kabhī iz.hār-e-mohabbat kabhī shikvoñ ke liye
tujh se milne kā koī roz bahānā chāhe

maiñ ye suntā huuñ ki ye kār-e-mohabbat hai savāb
maiñ bhī is kaam meñ imdād karūñgā ik din

tafsīl se likkhā thā jab naama mohabbat kā
'ġhālib' ko ġharaz kyā thī paiġhām-e-zabānī se

ye kyā chiiz tāmīr karne chale ho
binā-e-mohabbat ko vīrān kar ke

havā ke saath mohabbat ke dhūp-sahrā meñ
guloñ ko bhī ḳhas-o-ḳhāshāk honā paḌtā hai

hādse rāh-e-mohabbat kā muqaddar Thahre
jab hameñ dil se bhulānā to ḳhabar kar denā

un se iz.hār-e-mohabbat jo koī kartā hai
duur se us ko dikhā dete haiñ turbat merī

jaate jaate vo yahī kar ga.e tākīd 'jalīl'
dil meñ rakhiyegā hifāzat se mohabbat merī

kyā kahiye karishma-sāz the kyā āġhāz-e-mohabbat ke vo din
jab ḳhud se bhī ham hairān hue us ne bhī bahut hairān kiyā

aksar aisā bhī mohabbat meñ huā kartā hai
ki samajh-būjh ke khā jaatā hai dhokā koī

mere gītoñ meñ mohabbat ne jalā.e haiñ charāġh
aur yahāñ zulmat-e-zardār ke ghere haiñ tamām

daur-e-hāzir meñ mohabbat kā koī mol nahīñ
dil bhī hone lage nīlām zamīnoñ kī tarah

sar-e-mayyat hai ye ibrat kā nauha
mohabbat kā janāza jā rahā hai

mohabbat kā bhañvar apnā shikāyat kī jihat apnī
vo mehvar dūsrā thā jo mire pindār tak aayā

mohabbat kā asar phir dekhnā marne to do mujh ko
vo mere saath zinda dafn ho jaa.eñ ajab kyā hai

zarā sī ek farmā.ish bhī puurī kar nahīñ sakte
mohabbat karne vaale log bhī lāchār kaise haiñ

mirī nadīm mohabbat kī rif.atoñ se na gir
buland bām-e-haram hī nahīñ kuchh aur bhī hai

haiñ us ke sar-varaq pur-ḳhār phūloñ se ziyāda
hameñ aglī mohabbat kā shumāra mil gayā hai

mohabbat hai munj jiiv chaman kā so merā
prit phuul rañg rañg ke us kī nishānī

mohabbat kī sultānī hai sab jagat meñ
ki us sam nahīñ koī gyānī-o-dānī