Tags-Mohabbat

kaun bhūlā hai 'na.īm' un kī mohabbat kā fareb
phir bhī in taaza ināyāt se jī Dartā hai

har tamannā dil se ruḳhsat ho ga.ī
aaj mustahkam mohabbat ho ga.ī

dekhiye zabt-e-mohabbat kā ma.aal
ashk-e-ġham piine kī aadat ho ga.ī

muskurā.e mujh ko rotā dekh kar
aap kī zāhir mohabbat ho ga.ī

ba-nām-e-ġham ba-unvān-e-mohabbat
junūñ-afroz afsāne bane haiñ

aayā huuñ barī ho ke maiñ aivān-e-ḳhirad se
ye shahr-e-mohabbat hai yahāñ merī sazā kyā

hai mahv-e-tamannā dil-e-āzurda ki dekhe
pindār-e-mohabbat meñ hai andāz-e-ḳhudā kyā

tū ne to tark-e-mohabbat kī qasam khaa.ī thī
kyuuñ tirī aañkh mujhe dekh ke bhar aa.ī hai

ishq o mohabbat kyā hote haiñ kyā samjhā.ūñ vaa.iz ko
bhaiñs ke aage biin bajānā mere bas kī baat nahīñ

hiran mohabbat ke sabza-zāroñ meñ jaane kab chaukḌī bhareñge
vo jaate jaate savāl aisā 'hasan' uThā kar chalā gayā hai

ham to aise rone lage haiñ
jaise mohabbat guzar ga.ī hai

kaheñge log 'ahsan' tum ko pāgal
mohabbat hai to ye tohmat uThāo

mire paañv meñ paa.el kī vahī jhankār zinda hai
mohabbat kī kahānī meñ mirā kirdār zinda hai

saat sandūqoñ meñ bhar kar dafn kar do nafrateñ
aaj insāñ ko mohabbat kī zarūrat hai bahut

maiñ is sharāb-e-mohabbat se tañg huuñ 'arshī'
ki jitnā pīji.e baḌhtī hai aur utnī pyaas

vo dil hī kyā jo mohabbat se āshnā na huā
safīna kyā vo jise bahr-e-be-karāñ na milā

ġham-e-hayāt ne fursat na dī sunāne kī
chale the ham bhī mohabbat kī dāstāñ le kar

kasrat-e-shauq-e-mohabbat meñ mujhe har tarah se
jis taraf dekhūñ ruḳh-e-dil-dār aatā hai nazar

jaane kab kaise giraftār-e-mohabbat hue ham
jaane kab Dhal ga.e iqrār meñ inkār ke rañg

'shāhid' dayār-e-dil meñ añdherā hai chaar sū
raushan koī charāġh-e-mohabbat na kar sake