Tags-Mohabbat

ek nākām mohabbat hī hameñ kaafī hai
ham dobāra bhī agar karte ḳhasāra hotā

ġham-o-alam ne to kar rakhā hai hamāre chehre ko zard 'joshish'
lahū ke aañsū agar na ro.eñ na hoñ mohabbat meñ surḳh-rū ham

lipaT lipaT ke shajar ko lubhānā chāhtī hai
har ek bel mohabbat jatānā chāhtī hai

ye nasl lafz-e-mohabbat se āshnā hī nahīñ
koī kisī se bhī tahzīb kā gila na kare

abhī mujh se kisī ko mohabbat nahīñ huī
so dil ke baaġh meñ phuul bhī nahīñ khile

saḳht bedard hai tāsīr-e-mohabbat ki unheñ
bistar-e-nāz pe sote se jagā rakkhā hai

kahte haiñ ahl-e-jahāñ dard-e-mohabbat jis ko
naam usī kā dil-e-muztar ne davā rakkhā hai

sun ke ahvāl-e-mohabbat ko mirā bolā vo shoḳh
jaan dene kā tujhe achchhā bahāna yaad hai

kabhī ālām-e-daurāñ se na thak kar baiTh jaanā tum
mohabbat kā uḳhuvvat kā zamāna DhūñDte rahnā

aziyyateñ hī mohabbat kī ruuh hotī haiñ
mire vajūd meñ itnī sī aas rahne do

jaan jaatī hai chalī jaa.e balā se lekin
ham mohabbat ko tamāshā nahīñ hone deñge

mohabbat butoñ kī ye dil chhoḌ de
kisī tarah chhātī se patthar Tale

na laayā koī sham-o-gul gor par
lahad meñ bhī dāġh-e-mohabbat jale

yahī samjheñge mohabbat ko hayāt-e-jāved
jo samajhte haiñ use maut kā paiġhām abhī

mohabbat aur mohabbat kā shajar baaqī rahegā
chale jā.eñge ham lekin safar baaqī rahegā

hañsā karte haiñ akasr log dīvānoñ kī bātoñ par
jahāñ vaale nahīñ samjhe mohabbat kī zabāñ shāyad

huī na aam jahāñ meñ kabhī hukūmat-e-ishq
sabab ye hai ki mohabbat zamāna-sāz nahīñ

ham faqirān-e-mohabbat ke ajab tevar haiñ
razm-e-ka.aba bhī bane bazm-e-kalīsā bhī hue

misāl-e-sāya mohabbat meñ jaal apnā huuñ
tumhāre saath giraftār-e-hāl apnā huuñ

tujh se hameñ shadīd mohabbat hai is liye
karte haiñ ittifāq tire iḳhtilāf se