Tags-Mohabbat

kyuuñ na ho.e dil jal ke ḳhākistar naman
ātishīñ-rū kī mohabbat aag hai

ye mohabbat bhī ek nekī hai
is ko dariyā meñ Daal aate haiñ

merā miTnā nahīñ āsān mohabbat kī qasam
maut hai naam tire dil se utar jaane kā

hashr tak ro.egī duniyā-e-mohabbat mujh ko
silsila ḳhatm na hogā mire afsāne kā

kiye saikaḌoñ ghar mohabbat ne ġhārat
suno jis mohalle meñ ronā paḌā hai

duniyā se 'azīz' us ko hotī hai mohabbat bhī
duniyā jise Dastī hai kahiye bhī to kyā kahiye

chhupāyā rāz-e-mohabbat ko dil meñ par haihāt
kare hai naam mirā bad ye chashm-e-nam gustāḳh

baḌhī hai aapas meñ bad-gumānī maza mohabbat kā aa rahā hai
ham us ke dil ko TaTolte haiñ to ham ko vo aazmā rahā hai

har varaq sharh-e-mohabbat kā 'shakīl'
apnā dīvān huā jaatā hai

tumhārī aañkh meñ Thahrā huā paanī batātā hai
mohabbat kī thī tum ne aur us kā maan rakkhā hai

kuchh mohabbat hai kuchh muravvat hai
aaj paḌtī hai mujh pe pyaar se aañkh

us kā chehra us kī āñkheñ ek qayāmat haa.e mohabbat
tasvīreñ ḳhud batlātī haiñ saarī tafsīlāt ġhazal kī

thī alag raah magar tark mohabbat nahīñ kī
us ne bhī sochā bahut ham ne bhī ujlat nahīñ kī

zaḳhm to bahut aa.e phir bhī hausla rakkhā
umr-bhar mohabbat meñ ham ne dil baḌā rakkhā

maiñ huuñ shahīd-e-rāh-e-mohabbat magar 'alīm'
merā ġhalat pata mirī lauh-e-mazār de

hijābāt-e-nazar jalvoñ kī bebākī se kyā uTTheñ
mohabbat kī nazar ko dīda-e-hairāñ bhī kahte haiñ

hai jis ke dam se duniyā-e-mohabbat jannat-e-armāñ
usī jān-e-tarab ko fitna-e-daurāñ bhī kahte haiñ

mohabbat ko tum laakh pheñk aao gahre kueñ meñ
magar ek āvāz pīchhā karegī

ham jalāte rahe har-gām mohabbat ke charāġh
vo rah-o-rasm kī har sham.a bujhātā guzrā

garche aapas meñ vo ab rasm-e-mohabbat na rahī
toḌ-joḌ un ke ba-dastūr chale jaate haiñ