Tags-Mohabbat

bā-vasf-e-zabt-e-rāz mohabbat hai āshkār
uqda hai dil kā aqd-e-surayyā kaheñ jise

vo dasht-e-mohabbat meñ rakkhe qadam ai 'inshā'
sar apne ko aage hī jo tan se judā samjhe

jaan jaane ko hai aur raqs meñ parvāna hai
kitnā rañgīn mohabbat tirā afsāna hai

aur phir is ke sivā sehr-e-mohabbat kyā hai?
yak-ba-yak jaise koī dil ke qarīñ aa jaa.e

kahīñ ye tark-e-mohabbat kī ibtidā to nahīñ
vo mujh ko yaad kabhī is qadar nahīñ aa.e

paar dariyā-e-mohabbat se utarnā hai muhāl
tum lagāoge kināre to kināre hoñge

yuuñ mohabbat ko umr-bhar paḌhnā
zindagī imtihān ho jaise

dil vāloñ ko dil vāloñ se hai harf-o-hikāyat
zāhir meñ mohabbat kā nishāñ kuchh bhī nahīñ hai

nizām-e-zīst kā mehvar mohabbat
haqīqat ek afsāne bahut haiñ

phir bevafā ko bahr-e-mohabbat samajh liyā
phir dil kī naav Duub ga.ī hai sarāb meñ

tum ko bhī āġhāz-e-mohabbat yaad to hogā kam se kam
pahle-pahal milte hī nazreñ ham donoñ sharmā.e the

haa.e vo rabt-o-zabt-e-mohabbat haa.e ye pās-e-shart-e-vafā
aaj na milne par bhī ḳhush haiñ kal mil kar pachhtā.e the

jism ko kar ke judā jag ho gayā masrūf par
ruuh meñ Thahrī mohabbat kī ravānī rah ga.ī

vaa.e majbūriyāñ mohabbat kī
zabt par iḳhtiyār ho jaatā

mohabbat lāzmī hai māntā huuñ
magar ham-zād ab maiñ thak gayā huuñ

mirī pahlī kamā.ī hai mohabbat
mohabbat jo tumheñ maiñ de chukā huuñ

guzishtagān-e-mohabbat ke ḳhvāb kī saugand
vo ḳhvāb hogā mukammal duā kiye jaa.eñ

haañ thaam mohabbat kī gar thaam sake Dorī
sājan hai tirā sājan ab tujh se to kyā chorī

TuuT jaatā hai dam mohabbat kā
bad-gumānī agar javāñ ho jaa.e

maiñ ne ibādatoñ ko mohabbat banā diyā
āñkheñ butoñ ke saath rahīñ dil ḳhudā ke saath