Tags-Mohabbat

mohabbat meñ kaThin raste bahut āsān lagte the
pahāḌoñ par suhulat se chaḌhā karte the ham donoñ

maiñ bīmār-e-mohabbat yuuñ to pahle bhī rahā huuñ
magar is zor kā bīmār pahle kab huā thā

ham ahl-e-dil haiñ mohabbat kī nisbatoñ ke amiin
hamāre paas zamīnoñ kā goshvāra nahīñ

dil-jazīre par hai us kī raushnī
ik sitāre se mohabbat hai hameñ

nahīñ az-rū-e-qānūn-e-mohabbat jurm-e-nazzāra
to phir kyuuñ haiñ janāb-e-dil agar dekho magar dekho

mohabbat meñ ārām sab chāhte haiñ
magar hazrat-e-'dāġh' kab chāhte haiñ

koī to mo.ajaza aisā bhī ho apnī mohabbat meñ
tire inkār se iqrār kī sūrat nikal aa.e

lo mubārak lazzat-e-ġham bhī hai ab to nāgavār
dil mohabbat meñ jo banñā chāhiye thā ban gayā

ye mohabbat hai ise dekh tamāshā na banā
mujh se milnā hai to mil hadd-e-adab se aage

kuchh tabī.at hī milī thī aisī chain se jiine kī sūrat na huī
jis ko chāhā use apnā na sake jo milā us se mohabbat na huī

sabr kar sabr ai dil-e-mahzūñ
is mohabbat meñ kyā nahīñ hotā

lagāyā mohabbat kā jab yaañ shajar
shajar lag gayā aur samar jal gayā

ham ko ma.alūm haiñ az-rū-e-mohabbat so ham
koī bhī dard ziyāda nahīñ rakhne vaale

chale ā.eñge ḳhud vo betāb ho kar
junūn-e-mohabbat mirā baḌh to jaa.e

nirāle haiñ rasm-o-rivāj-e-mohabbat
vahī paar hotā hai jo Duub jaa.e

zahr hai mere rag-o-pai meñ mohabbat shāyad
apne hī Dañk se bichchhū kī tarah mar jā.ūñ

hai mohabbat meñ kuchh havas pinhāñ
tū na kariyo kabhī kahā merā

khul ga.e vo to khulā apnī mohabbat kā bharam
valvale dil meñ hazāroñ the shanāsā.ī tak

yaad hai bandagi-e-ahl-e-mohabbat jis par
aap bhī faḳhr o mabāhāt kiyā karte the

kahāñ se maiñ kahāñ aayā kahāñ se dil kahāñ pahuñchā
mohabbat kī havā.eñ bhī qayāmat haiñ qayāmat haiñ