Tags-Mohabbat

ham ujālā haiñ ujāloñ se mohabbat hai hameñ
fann-e-taḳhlīq tirī shaan badal kar dekheñ

zehn kī jhiil meñ khil uTThā mohabbat kā kañval
dil meñ jo ġham kā hai tūfān badal kar dekheñ

tum chup rahe payām-e-mohabbat yahī to hai
āñkheñ jhukīñ nazar kī qayāmat yahī to hai

dil meñ har lahza hai sirf ek ḳhayāl
tujh se kis darja mohabbat hai mujhe

us ko āvāz do mohabbat se
us ke sab naam pyāre pyāre haiñ

ahd-e-vafā yā tark-e-mohabbat jo chāho so aap karo
apne bas kī baat hī kyā hai ham se kyā manvāoge

agar tum ko mujh se mohabbat na hotī
ye saudā na hotā ye vahshat na hotī

terī yaad ke saath aate na aañsū
agar mujh ko tujh se mohabbat na hotī

justujū terī tarah ġham tirī qurbat kyā hai
sochtā rahtā huuñ āḳhir ye mohabbat kyā hai

'yāvar' ham ko pā na sakoge jaise ab haiñ aise kab the
dil kī nazākat jurm-e-mohabbat kufr-e-tamannā kyā nahīñ dekhā

mirī mohabbat kī be-ḳhudī ko talāsh-e-haqq-e-jalāl denā
kabhī jo pābanda-e-sitam huuñ mujhe bhī azm-e-maqāl denā

rah-e-mohabbat kī saḳhtiyoñ se jo rañg-e-ruḳh thā jhulas chukā hai
tumhārī ulfat pe mar rahe haiñ mirā bhī chehrā ujaal denā

sar meñ saudā bhī nahīñ dil meñ tamannā bhī nahīñ
lekin is tark-e-mohabbat kā bharosā bhī nahīñ

dekh kar ye sila mohabbat kā
ḳhvāb palkoñ se maiñ girā aayā

ham bhī jiine kā mohabbat meñ tamāsha kar leñ
zindagī jo hai tamāsha to tamāsha hī sahī

fasāne yuuñ mohabbat ke sach haiñ par kuchh kuchh
baḌhā bhī dete haiñ ham zeb-e-dāstāñ ke liye

nādim āñkheñ soch rahī haiñ kal tārīḳh savāl karegī
itnā qaht-e-mohabbat kyuuñ thā kyā asbāb likhe jā.eñge

kaun hai jis ke sar kī khā.eñ qasam
kis ne ham se yahāñ mohabbat kī

aur kyā hai ye ghar kā sannāTā
ek āvāz hai mohabbat kī

haañ raas nahīñ ham ko mohabbat kā ḳhazāna
thak-hār ke ham saudāgarī karne lage haiñ