Tags-Mohabbat

ilāhī us ko mohabbat se kuchh ta.alluq hai
jo is tarah se sunātā hai naġhma-e-rañgīñ

chhupī hai tujh meñ koī shai use na ġhārat kar
jo ho sake to kahīñ dil lagā mohabbat kar

ye dard ki hai terī mohabbat kī amānat
mar jā.eñge is dard kā darmāñ na kareñge

yāroñ kī mohabbat kā yaqīñ kar liyā maiñ ne
phūloñ meñ chhupāyā huā ḳhanjar nahīñ dekhā

na armāñ le ke aayā huuñ na hasrat le ke aayā huuñ
dil-e-betāb meñ terī mohabbat le ke aayā huuñ

miTā kar hasti-e-nākām ko rāh-e-mohabbat meñ
zamāne ke liye ik dars-e-ibrat le ke aayā huuñ

tishnagī kam ho magar duur na hone paa.e
apne pyāse ko na sairāb-e-mohabbat kar jā

ḳhudā hai shāhid ki zindagī meñ vo sajda-hā-e-ġham-e-mohabbat
qazā hue the jo gāhe-gāhe ba-shart-e-fursat adā kiye haiñ

jo log kahte rahe haiñ ḳhudā mohabbat hai
ḳhud un ke hāthoñ hī ma.asūmiyat huī maslūb

is aqīdat ko mohabbat se badal le 'sālim'
kyā pata kab tirī tasbīh ke daane khul jaa.eñ

uf vo nazreñ jo mohabbat kā bharam rakh na sakeñ
haa.e vo kaif jo ehsās-e-garāñ tak pahuñche

so ga.e shahr-e-mohabbat ke sabhī daaġh o charāġh
ek saaya pas-e-dīvār abhī rotā hai

ye bhī ik rañg hai shāyad mirī mahrūmī kā
koī hañs de to mohabbat kā gumāñ hotā hai

is ziist pe sahrā kā gumāñ tak nahīñ hotā
ai naḳhl-e-mohabbat tirā saaya bhī ajab hai

balā-kashān-e-mohabbat meñ hai shumār mirā
ye inkishāf to mujh par kabhī huā hī nahīñ

haañ vo kāfir-e-nemat kor-zauq hai yaaro
jo ġham-e-mohabbat ko hādisa batātā hai

bas yahī ik kaam baaqī thā jo karnā hai mujhe
maiñ mohabbat bo rahā huuñ nafratoñ ke darmiyāñ

ye daur mohabbat kā lahū chaaT rahā hai
insān kā insān galā kaaT rahā hai

kahāñ rahī hai mohabbat kī aas shahroñ meñ
badal liye haiñ sabhī ne libās shahroñ meñ

merī āñkhoñ meñ yaar kī tasvīr
aks-e-ā.īna-e-mohabbat hai