Tags-Mohabbat

maiñ mohabbat meñ luTā baiThā huuñ dil kī duniyā
kaam ye aisā bhī kab hai ki pazīrā.ī ho

koī anjān na ho shahr-e-mohabbat kā makīñ
kaash har dil kī har ik dil se shanāsā.ī ho

maiñ mohabbat ko chhupātā rahā lekin be-sūd
baat chhuptī hai kahāñ jis meñ ki sachchā.ī ho

ho sake to dil meñ paidā kar mohabbat kā ḳhayāl
ye muqaddas lafz sat.h-e-āb par likhā na kar

ye dekheñ rāz-e-dil ab kaun kartā hai ayaañ pahle
nazar kartī hai iz.hār-e-mohabbat yā zabāñ pahle

ye daraḳhtoñ ke saa.e jo chup-chāp haiñ ham mohabbat-zadoñ ke ye hamrāz haiñ
ab yahīñ dekhnā raat pichhle pahar do dhaḌakte diloñ kī sadā aa.egī

tū merī ḳhū-e-mohabbat badal nahīñ saktā
zamāne mujh ko tirī be-ruḳhī se kyā lenā

ye ik shikast jo ham ko huī mohabbat meñ
zamāne bhar kī futūhāt se ziyāda hai

ye saarī bāteñ chāhat kī yuuñ hī kartā rahūñgā
mohabbat meñ magar kuchh kuchh kamī kartā rahūñgā

nahīñ bāzār-e-mohabbat meñ ḳharīdārī-e-dil
chhān Daalī hai har ik maiñ ne dukān-e-dehlī

kaun sī raah chalūñ kufr mohabbat sach kah
kaam aa.egā vahāñ maz.hab-e-islām ki tū

kaun piitā hai mohabbat kā piyāla pī le
mudda.ī legā mire haath se ik jaam ki tū

tujh ko kyuuñ ranjish-e-bejā hai adū kā khaTkā
maiñ uThā.ūñgā mohabbat meñ ye ilzām ki tū

huī thī der se ham ko mohabbat
hamārī jald shādī ho ga.ī thī

sunā kartā huuñ ta.ane hijr meñ kyā kyā raqīboñ ke
banā huuñ is mohabbat meñ malāmat kā nishāna bhī

maiñ to kuchh bhī nahīñ kartī huuñ mohabbat ke liye
ishq vaale to luTā dete haiñ sultānī tak

udaas dil ko mohabbat kā aasrā degī
vo mujh ko chhū ke mirā hausla baḌhā degī

us ne āñchal se nikālī mirī gum-gashta bayāz
aur chupke se mohabbat kā varaq moḌ diyā

ka.aba-o-dair-o-kalīsā kī fazāoñ se alag
aao ta.amīr mohabbat kā jilau-ḳhāna kareñ

māñgne aayā huuñ maiñ tum se mohabbat
ai ḳhudā tum bhī zarā āmīn kahnā