Tags-Mohabbat

rahā ḳharāb-e-mohabbat hī vo jise tū ne
ḳhud apnā dard-e-mohabbat dikhā ke luuT liyā

ye daur-e-mohabbat bhī ajab daur hai is meñ
ai 'naqsh' sahāroñ ne bhī dil toḌ diyā hai

iz.hār-e-mohabbat bhī hai ġhazab iz.hār-e-mohabbat kaun kare
hujjat un se jhagḌā mujh se har baar huī har baar huā

ye haal ho gayā āḳhir tirī mohabbat meñ
ki chāhte haiñ tujhe aur tirī ḳhabar se ga.e

yahī taqāzā hai is baar bhī mohabbat kā
badan pe gard-e-safar ko jo mal sako to chalo

mohabbat in dino jo ghaT ga.ī vaañ
to kuchh paate nahīñ us paas jā kar

dimāġh-o-dīda-o-dil bar-sar-e-paikār hote haiñ
mohabbat kī kahānī meñ ka.ī kirdār hote haiñ

ġham na kar tū jo taḌaptā huuñ maiñ gaahe gaahe
jaate jaate hī mohabbat kā asar jaatā hai

ai nasīm-e-saharī bū-e-mohabbat le aa
turra-e-yār satī itr kī mahkār kuuñ khol

mohabbat se bach kar kahāñ jā.iyegā
talātum hai āġhosh-e-sāhil nahīñ hai

vo kis nāz-o-andāz se kah rahe haiñ
'shakīl' ab mohabbat ke qābil nahīñ hai

mohabbat se hameñ tū ne palaT kar kyoñ nahīñ dekhā
tirī badlī nazar ke zāviye sone nahīñ dete

aur kuchh chāhiye mohabbat meñ
hālat-e-hāl-e-dil zubūñ nahīñ kuchh

kuchh aur zaḳhm-e-mohabbat meñ baḌh ga.ī hai kasak
ye soch kar ki abhī to hayāt baaqī hai

'fazl' aa.iin mohabbat kā badalne ke liye
ahl-e-dil kis liye majbūr kiye jaate haiñ

aisā nahīñ ki un se mohabbat nahīñ rahī
jazbāt meñ vo pahlī sī shiddat nahīñ rahī

na chheḌo baat ulfat kī mohabbat aur chāhat kī
fareb-e-husn meñ ham ne sitam kyā kyā nahīñ dekhā

hasīn taaj kī sūrat ye be-sadā patthar
dikhā rahe haiñ mohabbat kā mo.ajiza patthar

chhat pe aa jaate the kapḌoñ kā bahānā kar ke
kyā mohabbat ke the jazbāt zarā yaad karo

kis qadar merī mohabbat ke zamāna thā ḳhilāf
bas akelī thī mirī zaat zarā yaad karo