Tags-Mohabbat

mohabbat beach meñ dīvār aane se huī thī
ki ham donoñ kā qad dīvār se thoḌā baḌā thā

taḌap shīshe ke TukḌe bhī uḌā lete haiñ hiire kī
mohabbat kī nazar jaldī se pahchānī nahīñ jaatī

uThā.e phirtā rahā maiñ bahut mohabbat ko
phir ek din yūñhī sochā ye kyā musībat hai

bahut ḳhūb-sūrat ho tum bahut ḳhūb-sūrat ho tum
kabhī maiñ jo kah duuñ mohabbat hai tum se

balā se mirī jaan jaatī rahe
mohabbat kā haq to adā kar diyā

kaun kahtā hai mohabbat kī zabāñ hotī hai
ye haqīqat to nigāhoñ se bayāñ hotī hai

zabt sailāb-e-mohabbat ko kahāñ tak roke
dil meñ jo baat ho āñkhoñ se ayaañ hotī hai

sar ho dar-e-jānāñ pe dam apnā nikal jaa.e
ye kaam mohabbat meñ kar jaa.eñ to achchhā ho

rah jaa.e mohabbat kā duniyā meñ bharam kuchh to
do phuul hī turbat pe dhar jaa.eñ to achchhā ho

abhī to gum-karda-rāh ḳhud haiñ mai-e-mohabbat kī be-ḳhudī meñ
agar kabhī aap meñ ham aa.e to us kī bhī justujū kareñge

ajab thā jurm-e-mohabbat ki jis pe dil ne mire
sazā bhī paa.ī nahīñ aur muaaf bhī na huā

kaun chhup chhup ke mohabbat nahīñ kartā āḳhir
kyā burā.ī hai yahī khel khulā hone meñ

kyā tamāshā hai rag-e-lailā meñ Duubā neshtar
fasd-e-majnūñ bā.is-e-josh-e-mohabbat khul ga.ī

ye merī pyaas ke sāġhar tere laboñ kī sharāb
ravāj-o-rasm-e-mohabbat kā mojaza hogā

chāhe jidhar le jaa.e mohabbat
ab to dāman thaam liyā hai

vo jis ghamanD se bichhḌā gila to is kā hai
ki saarī baat mohabbat meñ rakh-rakhāv kī thī

zabāñ tak jo na aa.e vo mohabbat aur hotī hai
fasāna aur hotā hai haqīqat aur hotī hai

nigāheñ taaḌ letī haiñ mohabbat kī adāoñ ko
chhupāne se zamāne bhar kī shohrat aur hotī hai

shahr mohabbat kā yuuñ ujḌā
duur talak tāmīr nahīñ hai

hijr ko hausla aur vasl ko fursat darkār
ik mohabbat ke liye ek javānī kam hai