Tags-Mohabbat

iz.hār-e-mohabbat kī talab dil meñ liye huuñ
tanhā jo mile terī sahelī to batā.ūñ

agar chubhtī huī bātoñ se Darnā paḌ gayā to
mohabbat se kabhī tumko mukarnā paḌ gayā to

ye sach hai baham us kī mohabbat bhī nahīñ thī
aur tark marāsim hoñ ye himmat bhī nahīñ thī

the rāh-e-mohabbat meñ paḌāv ka.ī lāzim
kyā kījiye ruknā mirī fitrat bhī nahīñ thī

kisī kī aañkh ḳhālī ho ga.ī thī
mohabbat itnī mahñgī ho ga.ī thī

mujh se to dil bhī mohabbat meñ nahīñ ḳharch huā
tum to kahte the ki is kaam meñ ghar lagtā hai

mizāj-e-husn-o-mohabbat meñ sādgī na fareb
na vo yaqīn rahā ab na vo daġhā.eñ rahīñ

na vo ayādat-o-taskīñ na vo dil-e-ranjūr
na ab vo dard-e-mohabbat na vo davā.eñ rahīñ

ādāb-e-mohabbat the ki dāman nahīñ chhoḌā
tum duur na the duur na the band-e-qabā bhī

hijr ko hausla aur vasl ko fursat darkār
ik mohabbat ke liye ek javānī kam hai

kyā batā.ūñ kis tarah dil aa gayā
kyā kahūñ kaise mohabbat ho ga.ī

sitam-koshī meñ dil-sozī bhī shāmil hotī jaatī hai
mohabbat aur mushkil aur mushkil hotī jaatī hai

iltijā.eñ kar ke māñgī thī mohabbat kī kasak
be-dilī ne yuuñ ġham-e-nāyāb vāpas kar diyā

chehre pe koī rañg shikāyat kā nahīñ thā
lekin vo tabassum hī mohabbat kā nahīñ thā

vo be-ḳhudī thī mohabbat kī be-ruḳhī to na thī
pe us ko tark-e-ta.alluq ko ik bahāna huā

paikar-e-nāz pe jab mauj-e-hayā chaltī thī
qarya-e-jāñ meñ mohabbat kī havā chaltī thī

maiñ din-rāt tujh ko karūñ yaad kitnā
mohabbat tirī ab sazā de rahī hai

ma.abad-e-husn-o-mohabbat bārgāh-e-soz-o-sāz
tere but-ḳhāne hasīñ tere kalīsā dil-navāz

kuchh tabī.at hī milī thī aisī chain se jiine kī sūrat na huī
jis ko chāhā use apnā na sake jo milā us se mohabbat na huī

us ek shaḳhs ko chāhūñgā tā-dam-e-āḳhir
vo jis ne mujh se mohabbat ke ba.ad nafrat kī