Tags-Ahvaal

kis shakl se ahvāl kahūñ ab maiñ ilāhī
sūrat se mirī jis meñ vo bezār na hove

un ko ye fikr hai ab tark-e-ta.alluq kar ke
ki ham ab pursish-e-ahvāl kareñ yā na kareñ

ahvāl ek hai dil-e-vahshat-sarisht kā
yā juz se bāñdhiye ise yā kul se bāñdhiye

raat kī mahfil-ārā.ī kā pichhle pahar ahvāl na pūchh
sham.a kī lau bhī sard paḌī thī raakh huā parvāna bhī

mere ahvāl kā afsāna banāyā hotā
har parī-zād ko dīvāna banāyā hotā

duniyā meñ khapā.e saal ka.ī āḳhir meñ khulā ahvāl yahī
vo ghar kā ho yā bāhar kā har dukh kā mudāvā ghar meñ hai

merā ahvāl-e-faqr mat pūchho
zohd misl-e-farīd kartā huuñ

us ne ahvāl pūchhā ham mar ga.e
kis qadar qissa-muḳhtasar haiñ ham

ishq meñ jis ke ye ahvāl banā rakkhā hai
ab vahī kahtā hai is vaz.a meñ kyā rakkhā hai

ye na qissa hai na andāz-e-bayāñ
ye mirā ahvāl hai yār-e-azīz

kyā kare koī kisī se pursish-e-ahvāl bhī
aaj sab haiñ apnī apnī karbalā oḌhe hue

dil kā ahvāl pūchhte kyā ho
ḳhaak uḌtī hai ābgīne meñ

dastūr hai guzārish-e-ahvāl-e-vāqa.ī
qānūn ye nahīñ hai ki shikva na chāhiye

mat pūchh tū jaane de ahvāl ko furqat ke
jis taur kaTe kaaTe ayyām musībat ke

tū ne pūchhā hai to ahvāl batā dete haiñ
bas tirī yaad hai aur āḳhirī-dam haiñ ham haiñ

is zamāne meñ na ho kyūñkar hamārā dil udaas
dekh kar ahvāl-e-ālam uḌte jaate haiñ havās

ai masīhā-e-zamāñ dekh Tuk aa kar ahvāl
ki tirī chashm ke yaañ marte haiñ bīmār ka.ī

vo dilbarī kā us kī jo kuchh haal hai so hai
aur apnī dil-dahī kā jo ahvāl hai so hai

ahvāl-e-mohabbat meñ kuchh farq nahīñ aisā
soz o tab-o-tāb avval soz o tab-o-tāb āḳhir

kis suuñ 'valī' apas kā ahvāl jā kahūñ maiñ
sar-tā-qadam maiñ ġham suuñ ġham-ḳhāna ho rahā huuñ