Tags-Ahvaal

vasl kī shab kā maza hotā hai avval jaise
vaise hī hotā hai ahvāl batar āḳhir-e-shab

jo pūchhe mujh sā hai koī bad-zan kaho na ahvāl-e-vasl-e-dushman
ye maiñ ne maanā ki tum ho pur-fan ilaaj kyā chashm-e-sharmgīñ kā

yuuñ taras khā ke na pūchho ahvāl
tiir siine pe lagā ho jaise

na pūchho ki ahvāl nā-gufta-bah hai
musībat ke maare hue dil kā apne

fasāna jis ko samajh kar bigaḌ rahe ho tum
jo sun sako to vo ahvāl vāqa.ī bhī hai

bhalā hogā kuchh ik ahvāl us se yā burā hogā
ma.aal apnā tire ġham meñ ḳhudā jaane ki kyā hogā

'ġhālib' tirā ahvāl sunā deñge ham un ko
vo sun ke bulā leñ ye ijārā nahīñ karte

ab apne ghar kā bhī ahvāl lab par lā nahīñ sakte
kiyā karte the ham ahvāl-e-ālam kā bayāñ kyā kyā

jab kahā maiñ ne ki sun haal kahā ta.an se ye
tum salāmat raho ahvāl sunāne vaale

ab tak mire ahvāl se vaañ be-ḳhabarī hai
ai nāla-e-jāñ-soz ye kyā be-asarī hai

kisī rihā.ī kā ahvāl jānñe ke liye
sirhāne baiThe haiñ ḳhāmosh jāñ-ba-lab ke sab

sune baġhair hī ahvāl-e-vāqa.ī ham se
hameñ supurd-e-havālāt kar ke jaatā hai

hameñ us ne sabhī ahvāl se anjān rakkhā
hamāre aur apne biich parda taan rakkhā

hamāre nāla-e-dil kā na pūchhiye ahvāl
galī se yaar kī himmat bhī ab ke haar aayā

suntā nahīñ jo ab mirā ahvāl vāqa.ī
ik roz le kar apne fasāne bhī aa.egā

bātoñ se to nāseh ko ham sīdhā-sāda samjhe the
vo to ik din mai-ḳhāne meñ hazrat ke ahvāl khule

khil rahā hai mere chehre se mirā ahvāl-e-ġham
kah rahī hai merī ḳhāmoshī hī afsāna mirā