Tags-Ahvaal

judā dīvār se kab taaq hai koī batāo to
dikhā.ī de hai pur-ahvāl ko do ik maah sūrat meñ

sau tarah kahūñ dil kā ahvāl huzūr us ke
mere to nahīñ rahne ausān mirā sāhab

kah sakte to ahvāl-e-jahāñ tum se hī kahte
tum se to kisī baat kā pardā bhī nahīñ thā

miliye us shaḳhs se jo aadam hove
naaz us ko kamāl par bahut kam hove

un logoñ se kyā kahiye ki kyā biit rahī hai
ahvāl magar tū to samajhtā hai hamārā

nāma-bar dil kī tasallī ke liye bhejūñ huuñ
varna ahvāl mirā qābil-e-maktūb na thā

dāġh-e-jigar kā apne ahvāl kyā sunā.ūñ
bharte haiñ us ke aage sham-o-charāġh paanī

sad shukr vo the mā.il-ba-karam mar.ūb the ro.ab-e-husn se ham
un se ahvāl-e-dil-e-pur-ġham kahne kī jasārat kyā karte

havā! kuchh aaj kī shab kā bhī ahvāl sunā
kyā vo apnī chhat par aaj akelā thaa?

jaane kyā kahte agar pūchhtā ahvāl koī
ḳhair ye bhī huā achchhā na kisī ne pūchhā

mauj-e-dariyā kī tarah zabt meñ aa saktā nahīñ
koī kyuuñ kar kahe ahvāl-e-pareshāñ merā

nahīñ dam mārne kī mujh ko tire aage majāl
haa.e suntā hai tū kis tarah se sab kā ahvāl

huuñ maiñ ik āshiq-e-be-bāk o ḳharābātī o riñd
mujh se mat pūchh mire ilm-o-adab kā ahvāl

zor hai jaise ki nisbat namak o riish ke biich
maiñ hī samjhūñ tirī kaifiyyat-e-lab kā ahvāl

kyā kahūñ tujh se mirī jaan maiñ shab kā ahvāl
tujh pe raushan hai dil-e-vasl-talab kā ahvāl

ai miyāñ aaj to do baat mirī bhī sun le
kahā chāhūñ huuñ maiñ tujh se bhalā kab kā ahvāl

lutf hai sab se sazāvār-e-ġhazab ek huuñ maiñ
ḳhuub dekhā jo tire lutf o ġhazab kā ahvāl

mahram-e-rāz nahīñ miltā koī dard hai ye
kyā tabīboñ se kahūñ ishq ke tab kā ahvāl

kyā koī ḳhush ho mire sher ko sun ke 'hasrat'
dard-e-dil hai ye nahīñ aish-o-tarab kā ahvāl

dil ko ḳhālī karūñ ro ro ke magar maiñ be-kas
kaun suntā hai mire rañj-o-ta.ab kā ahvāl