Tags-Murder

shajar ke qatl meñ is kā bhī haath hai shāyad
batā rahā hai ye bād-e-sabā kā chup rahnā

kis ne izn-e-qatl de kar sādgī se kah diyā
aadmī kī aadmī se dushmanī achchhī nahīñ

satānā qatl karnā phir jalānā
vo be-ta.alīm kyā kyā jānte haiñ

maanā na turk-e-chashm ne āḳhir kiyā hī qatl
har-chand dil ne diiñ tire lab kī duhā.iyāñ

kuchh qatl meñ bhī chāshnī-e-mai zarūr hai
qātil bujhā ke lā.iyo ḳhanjar sharāb meñ

shahādat mile chaar tan suuñ tujhe gar kare qatl tū pāñch mūziyāñ kuuñ dil ke
shahīdoñ kī rah saath har vaqt hamdam ho jyuuñ sher sherān jañgoñ meñ rahiye

jo mire qatl ke darpai thā na jaane kab se
aaj vo bhī mujhe jiine kī duā detā hai

ho na kyūñ-kar vārdāt-e-qatl rozāna abhī
kū-e-qātil meñ nahīñ chaukī abhī thāna abhī

qatl to kartā nahīñ vo kis tarah
us ke gunāhgār Thahar jā.iye

kyuuñ un se vaqt-e-qatl kiyā shikva ġhair kā
karnī thī maġhfirat hī kī apnī duā mujhe

hai mere qatl ke darpai ḳhamoshī
sadā ke dar meñ rahnā paḌ rahā hai

qatl par bāñdh chukā vo but-e-gumrāh miyāñ
dekheñ ab kis kī taraf hote haiñ allāh miyāñ

mazā ḳhalvat kā aa.e qatl-gah meñ
vahāñ koī na ho qātil ho ham hoñ

qatl kartā thā mujhe vo pai-ba-pai
us ke hāthoñ meñ magar ḳhanjar na thā

kī mire qatl ke ba.ad us ne jafā se tauba
haa.e us zūd-pashīmāñ kā pashemāñ honā

ishrat-e-qatl-gah-e-ahl-e-tamannā mat pūchh
īd-e-nazzāra hai shamshīr kā uryāñ honā

na.e zamāne meñ ab ye kamāl hone lagā
ki qatl kar ke bhī qātil nihāl hone lagā

iid hai qatl mirā ahl-e-tamāshā ke liye
sab gale milne lage jab ki vo jallād aayā

qahr to us vaqt TuuTā thā saf-e-a.adā meñ jab
chashm-o-lab se qatl karne vāliyāñ shāmil huiiñ

qaid-e-dil se hai mirī kākul-e-pechāñ nāzāñ
aur mire qatl se hai ḳhanjar-e-mizhgāñ nāzāñ