Tags-Murder

roz be-maqsad ḳhushāmad qatl kartī hai use
roz mar jaatā hai vo apnī anā ke sāmne

kyuuñ mire qatl ko talvār barahna kī hai
teġh-e-abrū kā to kaafī hai ishārā mujh ko

jis din ik zālim ne ik mazlūm kā nāhaq qatl kiyā
us din se is duniyā meñ kuchh rishtoñ kī pahchān paḌī

kis ne kis ko qatl kiyā pahchān sako to pahchāno
sāmne ye talvār paḌī tirshūl paḌā kirpān paḌī

vo teġh mil ga.ī jis se huā hai qatl mirā
kisī ke haath kā us par nishāñ nahīñ miltā

ham zamīn-e-qatl-gah par chalte haiñ siine ke bal
jāda-e-shamshīr sar karte haiñ peshānī se ham

qatl aalam hai tere abrū par
koī talvār se shahīd nahīñ

haath meñ le ke na ḳhanjar baiThiye
qatl karnā hai to bas kar baiThiye

us ne nibhā.ī ḳhuub mirī dostī 'razā'
ilzām-e-qatl-e-yār mujhī par lagā diyā

manzil manzil chal kar jab bhī aa.ī lahū meñ Duubī raat
aahaT aahaT qatl huā hai qadmoñ meñ sar dekhā hai

nafs-e-sarkash ko qatl kar ai dil
musta.id ho jihād par ai dil

vo qatl karte magar rahm aa gayā hai 'rashīd'
ye mere naale mire vāste amaan hue

jo qatl-o-ḳhūn kī āñdhī chalī to thamtī kyā
sabhī sharīk the bastī ke log sāzish meñ

tamām shaḳhsiyat us kī hasīñ nazar aa.ī
jab us ke qatl kī aḳhbār meñ ḳhabar aa.ī

qatl aur ḳhuuñ ke manāzir haiñ jo bastī bastī
kaise insānoñ kī duniyā kā tamāsha dekheñ

kyā kahīñ qatl ho gayā sūraj
raat se rāt-bhar se pūchhte haiñ

ye jo shāḳh-e-lab pe hujūm-e-rañg-e-sadā khilā hai galī galī
kahīñ koī sho.ala-e-be-navā kisī qatl-gāh meñ jal-bujhā

qatl kartā hai mujhe kyuuñ shab-e-furqat ḳhāmosh
ai mo.azzin mad-e-takbīr nahīñ aare haiñ

chhupā na qatl mirā ehtiyāt ke bā-vasf
jo us ne chhoḌe nahīñ vo nishān bolte haiñ

maiñ qatl ho ke bhī sharminda apne-āp se huuñ
ki is ke ba.ad to saarā zavāl hai us kā