Tags-Murder

jo bāñdhī kamar qatl-e-ushshāq par
kamar to na thī par kamar ho ga.ī

mere qatl kā jashn manāyā duniyā ne
phir duniyā ne dekhā zinda maiñ hī thā

ġhair hī qatl kare mujh ko zarūrī to nahīñ
merā qātil hai shanāsā to shanāsā hī sahī

malak-ul-maut agar kahiye unheñ to hai bajā
qatl be-teġh parī-zād kiyā karte haiñ

uThā ke sar mujhe itnā to dekh lene de
ki qatl-gāh meñ dīvāne aa.e haiñ kyā kyā

kar mujhe qatl vahāñ ab ki na ho koī jahāñ
tā mirī jaañ tū kahīñ ḳhalq meñ badnām na ho

shahīd-e-armāñ paḌe haiñ bismil khaḌā vo talvār kā dhanī hai
idhar to ye qatl-e-ām dekhā udhar vo kaisī kaTā-chhanī hai

mar jaate the ġhairoñ ke kāñTā bhī jo chubhtā thā
ḳhud qatl hue lekin royā bhī nahīñ jaatā

maiñ apne qatl kā us par kabhī shak bhī nahīñ kartā
agar vo muskurāte vaqt sharmāyā nahīñ hotā

maiñ to ai shahr ke hasīñ rasto
ghar se hī qatl ho ke aatā huuñ

pattiyāñ rotī haiñ sar pīTtī haiñ
qatl-e-gul aam huā hai ab ke

dāman dāman ḳhuun ke dhabbe
āḳhir kis kā qatl huā hai

udaas ho ga.ī ek fāḳhta chahaktī huī
kisī ne qatl kiyā hai ye intiqāl nahīñ

qatl se mere gar phire qātil
daañt se luuñ zabān-e-ḳhanjar kaaT

khul gayā ab ye ki vasl us kā ḳhayāl-e-ḳhām hai
aaj ummīdoñ kā dil hī dil meñ qatl-e-ām hai

shahr meñ ik qatl kī afvāh raushan kyā huī
ik taraf takbīr thī aur ik taraf jai kī pukār

darpai haiñ mere qatl ke ahbāb aur maiñ
ḳhush huuñ ki mere ḳhuun meñ rañgte haiñ yaar haath

teġh-e-ajal suuñ kis kā salāmat rahā hai jiiv
shoḳhī siiñ jab nigāh kareñ qatl-e-ām jaan

āñkheñ laḌīñ tujh se maiñ huā qatl
in turkoñ ne jañg-e-zargarī kī