Tags-Murder

teġh chal niklī dam-e-qatl gale par mere
maiñ ne tashbīh jo dī abrū-e-ḳhamdār ke saath

ai qātiloñ ke shahr bas itnī hī arz hai
maiñ huuñ na qatl koī tamāshā kiye baġhair

marne kī mujh ko aap se haiñ iztirābiyāñ
kartā hai mere qatl ko tū kyuuñ shitābiyāñ

qatl insāniyat kā karte haiñ
bheḌiye aadmī kī khāloñ meñ

is se afzūñ sitam nahīñ koī
qatl-e-āshiq ko tum ne kyā jaanā

sunā hai vo bhī mire qatl meñ mulavvis hai
vo bevafā hai magar itnā bevafā bhī nahīñ

na samajh sakī jo duniyā ye zabān-e-be-zabānī
tirā chehra ḳhud kahegā mire qatl kī kahānī

vo rañg-e-kūcha-o-bāzār hai ki ab bastī
gharoñ se duur alag qatl-gāh māñgtī hai

surāġh-e-qatl shahādat subūt sab gūñge
lahū ḳhamosh thā ḳhanjar bhī be-zabāñ niklā

maiñ qatl-e-ām kā shāhid huuñ 'qaisar'
ki bastī meñ mirā ūñchā makāñ thā

zamīñ bhī terī hai ham bhī tere ye milkiyat kā savāl kyā hai
ye qatl-o-ḳhūñ kā rivāj kyuuñ hai ye rasm-e-jañg-o-jidāl kyā hai

uThāo lauh-o-qalam hādse tamām likhūñ
ravāñ sadī meñ huā hai jo qatl-e-ām likhūñ

kyā dekhte ho raah meñ ruk kar yahāñ vahāñ
hai qatl-o-ḳhūñ kā ek sā manzar yahāñ vahāñ

gar karo qatl mire dil kuuñ taġhāful siiñ jaan
phir ke da.avā na karūñ hashr ke maidān meñ aa

maiñ vo shahīd-e-vafā huuñ ki qatl kar ke mujhe
mirā ġhanīm ta.assuf se haath maltā hai

chale ga.e vo sharar bo ke is qabīle meñ
to qatl hone ko 'shāhīn' ham bhī Thahre the

tumhārī teġh-e-adā kā fasāna suntā huuñ
mujhe to qatl karo dekhūñ to kaise qātil ho

vo sajī teġh ki dam meñ kare lākhoñ ko qatl
kaun kahtā hai miyāñ terī kamar mū sī hai

ḳhvāhisheñ qatl huī jaatī haiñ
ik mirā dīda-e-tar baaqī hai

qatl karte hī mujhe jalva-numā.ī bhī huī
dar pe hañgāma alag hai pas-e-dīvār judā