Tags-Murder

be-sahāroñ kā intizām karo
yaanī ik aur qatl-e-ām karo

sitamgaroñ kā tarīq-e-jafā nahīñ jaatā
ki qatl karnā ho jis ko kahā nahīñ jaatā

haañ maiñ ne bhī sunā hai tumhāre paḌos meñ
kal raat ek hādsa-e-qatl ho gayā

khule haiñ raaz ka.ī mere qatl ke mujh par
paḌhī hai maiñ ne kahānī ḳhabar se aage bhī

ham bhī hamesha qatl hue aur tum ne bhī dekhā duur se lekin
ye na samajhnā ham ko huā hai jaan kā nuqsāñ tum se ziyāda

qatl hone se bachā chāhtī hai
merī tanhā.ī duā chāhtī hai

qatl ke ba.ad bhī ik aish kā sāmāñ hogā
mai-e-gul-rañg lahū zaḳhm namak-dāñ hogā

amn kā qatl ho gayā jab se
shahr ab bad-havās rahtā hai

qatl-e-dil-o-jāñ apne sar hai apnā lahū apnī gardan pe
mohr-ba-lab baiThe haiñ kis kā shikva kis ke saath kareñ

qatl ke ba.ad vafā merī jo yaad aa.ī hai
sar jhukā.e hue baiThe haiñ pashemāñ ho kar

ye na bhūlo ki tum muhāfiz ho
yuuñ na insāñ kā qatl-e-ām karo

'bedār' ko dikhlā ke tū ne qatl auroñ ko kiyā
kartā hai ai zālim koī zulm-e-numāyāñ is qadar

barahna-jism bagūloñ kā qatl hotā rahā
ḳhayāl bhī nahīñ aayā kisī ko rone kā

na shādī-marg huuñ kyūñkar hai muzhda qatl-e-dushman kā
ki ghar meñ se liye shamshīr vo rotā nikal aayā

qatl se haath uThātā nahīñ qātil na sahī
ḳhuun se luThḌe hue haath to dho saktā hai

hamāre qatl kī sāzish ke darpai
hamārā nek ham-sāya bahut hai

maiñ qatl to ho gayā tumhārī galī meñ lekin
mire lahū se tumhārī dīvār gal rahī hai

qatl kar ke jo mujhe saa.e meñ pheñk aayā hai
log kahte haiñ vahī merā taraf-dār bhī hai

teġh-bāzī kā shauq apnī jagah
aap to qatl-e-ām kar rahe haiñ