Tags-Naaz

ba-zāhir chashm-e-sāqī mahv-e-ḳhvāb-e-nāz hai lekin
javāb-e-nargis-e-bedār bhī ma.alūm hotī hai

duniyā-e-mohabbat meñ ham se har apnā parāyā chhūT gayā
ab kyā hai jis par naaz kareñ ik dil thā vo bhī TuuT gayā

naaz kartā hai jo tū husn meñ yaktā ho kar
maiñ bhī nāzāñ huuñ tirā āshiq-e-shaidā ho kar

ham apne dostoñ par naaz kuchh yūñhī nahīñ karte
ki zikr-e-ḳhair ho yā bad hamārā chaltā rahtā hai

sahar-o-shām sar-e-anjuman-e-nāz na ho
jalva-e-husn to hai ishq-e-siyahkār to hai

'anvar' ne badle jaan ke lī jins-e-dard-e-dil
aur is pe naaz ye ki ye saudā garāñ na thā

adā-o-nāz aur andāz kā shaidā na ho jaa.e
mirā nāzoñ kā paalā dil kahīñ un kā na ho jaa.e

nit nit kā ye aanā jaanā mere bas kī baat nahīñ
darbānoñ ke naaz uThānā mere bas kī baat nahīñ

saf.ha-e-zehn pe naqsh hai us kā mere abhī tak nāz-o-niyāz
jaise sharmātā thā pahle vaise hī sharmā.e to

bismil-e-nāz rahā Kushta-e-raftār rahā
zindagī bhar mujhe marne se sarokār rahā

tū apne husn-o-nāz ke ġhurūr meñ hī jal bujhī
vo luuT legā bazm apnī ḳhush-kalāmiyoñ ke saath

aap binā ab kaun hamāre naaz uThā.e
kis se rūTheñ kis ko satā.eñ aap batā.eñ

ai husn tujhe itnā kyuuñ nāz-e-javānī hai
ye gul-badanī terī ik raat kī raanī hai

husn ziyāda aan mo.assir naaz kī shoḳhī ho vo chand
aise kitne harf likheñ aur naa.e ko ashmām kareñ

kahāñ se dekhiye mauj-e-surūr uThtī hai
nigāh-e-nāz bhī hai sāġhar-e-sharāb bhī hai

jinheñ hai naaz apne fāsloñ par
pakaḌne deñ zarā raftār mujh ko

baiThe adā se ek pal naaz se uTThe phir sambhal
pahlū churā ga.e nikal jī hī mirā jalā ga.e

tere sheroñ se mujhe mansūb kar dete haiñ log
naaz hai mujh ko jahāñ tū hai vahāñ maiñ bhī to huuñ

babūl sabz hai bāñdhe hisār-e-nāz 'ajmal'
mujhe bhī apnī zamīñ meñ chīnār bone de

shauq-e-nādīda meñ lazzat hai magar naaz nahīñ
aa mire ishq ko maġhrūr banā de aa kar