Tags-Nasiihat

merī rahbar bhī hai merī hamrāz bhī
de rahī hai nasīhat tabhī zindagī

baḌoñ ke darmiyāñ baiThā huā huuñ
nasīhat par nasīhat aa rahī hai

mujhe har vaqt karte haiñ nasīhat
na jaane kyuuñ mire pīchhe paḌe haiñ

bajā nasīhat-e-tark-e-sharāb bhī nāseh
ilāj-e-āmad-e-abr-e-bahār kyā hogā

yahāñ mujhe hī nasīhat ko haiñ sabhī maujūd
vahāñ to hosh kisī kā bajā nahīñ rahtā

shikva-ālūd nasīhat nahīñ achchhī nāseh
aap haiñ kushta-e-bedād-e-sitamgār ki ham

dekheñ nasīhat kyā vo ham ko paḌhāte haiñ
vaise nahīñ haiñ ham to sudharne vaale log

bas karo rahne bhī do vāz-o-nasīhat 'kaifī'
nāsehoñ ko to yahāñ paḌtī haiñ bāzār ke bhaav

ishq meñ ḳhud se mohabbat nahīñ kī jā saktī
par kisī ko ye nasīhat nahīñ kī jā saktī

ai yaar nasīhat ko agar gosh kare tū
ye taur-o-tarīq apne farāmosh kare tū

yaar mujh ko dekh zā ronā to un sā hijr meñ
mushfiqāna kuchh nasīhat jabki farmāne lage

musaḳhḳhar kar liyā har shaḳhs ko pand-o-nasīhat se
koī afsūñ thā yā taqrīr thī tāsīr nānak kī

pasand-tab.a thī us kī nasīhat jumla-ālam ko
dahan meñ thī zabān-e-pāk par tāsīr nānak kī

milne lagī sharārat hī meñ use to lazzat
vo māntā burā jab kartā koī nasīhat

nako nasīhat karo azīzāñ nigā hai hamnā muhan suuñ miitā
tajā huuñ maiñ riit sab jahāñ kī jidhāñ piyā suuñ priit kiitā

nasīhat se merī ye sau kos bhāge
tilañgoñ kī haq meñ jaise bhūtiyā hai

maiñ ek gunāhgār nasīhat kā hadaf huuñ
duniyā meñ bhī milte haiñ bahar-gām farishte

ai 'sa.ādat' jo nasīhat karte ho auroñ ko tum
is nasīhat ko kabhī apnī bhī bābat dekhnā

kuchh zarūr un meñ nasīhat thī magar yaad nahīñ
jo paḌhe the vo buzurgoñ ke maqūle likkhe

dil ko mahv-e-ġham-e-dildār kiye baiThe haiñ
riñd bante haiñ magar zahr piye baiThe haiñ