Tags-Neend

maiñ raat kā bhed to kholūñgā jab niiñd na mujh ko aa.egī
kyuuñ chāñd sitāre aate haiñ har raat mujhe samjhāne ko

kitnī gahrī udāsiyāñ haiñ abhī
niiñd kuchh de tasalliyāñ shāyad

taare dard ke jhoñke ban kar aate haiñ
ham bhī niiñd kī sūrat uḌte jaate haiñ

aap bhī nahīñ aa.e niiñd bhī nahīñ aa.ī
nīm-vā darīchoñ se jhāñktī hai tanhā.ī

kise niiñd aatī hai ai sanam tire tāq-e-abrū kī yaad meñ
kabhī ā.shnā-e-tah-e-baġhal sar-e-murġh-e-qibla-numā nahīñ

sunā hai niiñd ke aalam meñ vo masrūr lagte haiñ
to phir ḳhvāboñ meñ us zālim ko mahv-e-ḳhvāb dekheñge

niiñd TuuTe to use dekh ke aa.uuñ maiñ bhī
vo hai āñkhoñ meñ na.e ḳhvāb sajāne vaalā

na-jāne kaisī nigāhoñ se maut ne dekhā
huī hai niiñd se bedār zindagī ki maiñ huuñ

aah ye dil kī kasak haa.e ye āñkhoñ kī jalan
niiñd aa jaa.e agar aaj to ham bhī so leñ

chor hai dil meñ kuchh na kuchh yaaro
niind phir raat bhar na aa.ī aaj

raat karte haiñ sitāre kaise
raat bhar niiñd na aane se khulā

thī niiñd merī magar us meñ ḳhvāb us kā thā
badan mirā thā badan meñ azaab us kā thā

niiñd aatī hai to lagtā hai ke tum aa.e ho
aañkh kholūñ to kahīñ duur talak koī nahīñ

hamīñ the niiñd meñ jo un ko sā.ebāñ samjhā
khulī jo aañkh to dāman bhigo ga.e sapne

pur-habs shaboñ meñ abhī nīndeñ nahīñ utrīñ
niiñd aa.ī to phir bād-e-sabā tañg karegī

tā-der rahā zā.iqa-e-marg laboñ par
ik niiñd ke TuuTe hue manzar se nikal kar

sub.h se pahle badan kī dhuup meñ niiñd aa ga.ī
aur kitnā jāgtā maiñ raat kā jaagā huā

ḳhvāb se dil-lagī na kar lenā
niiñd se dushmanī na kar lenā

pas-e-darīcha do āñkheñ chamaktī rahtī thiiñ
ki us ko niiñd meñ chalne kā āriza thā bahut

bistar kī ek ek shikan nok-e-ḳhār thī
karvaT badalte niiñd na aa.ī tamām-rāt