Tags-Neend

terī furqat meñ tasavvur hai ye bedardī kā
ḳhvāb ham jānte haiñ niiñd ke aa jaane ko

be-maza hone lagī hai zindagī ba.ad-e-shabāb
raat abhī baaqī hai lekin niiñd uchaTtī jaa.e hai

sub.h tak shaam se kartī hai zabāñ zikr-e-jamāl
niiñd aatī hai kise sun ke kahānī terī

apne ham-rāh lahū rotī huī āñkhoñ par
niiñd kā bojh liye shab ko utartā dekhūñ

har chiiz kī bābat pūchhtī hai jaane kitnī ma.asūm hai ye
haañ is par raat ko sone se mīThī mīThī niiñd aatī hai

hameñ to rut ke badalne kī kuchh ḳhabar bhī nahīñ
ham apnī niiñd se jaage to har malāl gayā

ye sard raat ye āvārgī ye niiñd kā bojh
ham apne shahr meñ hote to ghar chale jaate

ahl-e-zar nahīñ ham log gahrī niiñd sote haiñ
din hazār lamhoñ kā raat ek saa.at kī

chalo achchhā huā āḳhir tumhārī niiñd bhī TuuTī
chalo achchhā huā ab tum bhī ḳhvāboñ se nikal aa.e

rāste ḳhvāb bhī dikhāte haiñ
niiñd meñ jāgte rahā kiije

ik daf.a kī niiñd kaisā jurm hai
umr bhar ham tum ko DhūñDe jā.eñge

nāla-kash 'manzar' se da.ave niiñd ke
achchhā achchhā shaam hone dījiye

niiñd yuuñ uḌ ga.ī ki lagtā hai
koī kāñTā chubhā hai āñkhoñ meñ

qatra qatra niiñd pighaltī rahtī hai
reza reza ḳhvāb bikharte jaate haiñ

jaane kis vaqt niiñd aa.ī hameñ
jaane kis vaqt ham tumhāre hue

uThā tū jā bhī chukā thā ajiib mehmāñ thā
sadā.eñ de ke mujhe niiñd se jagā bhī gayā

pīpal kā pattā TuuT ke dīvār Dhā gayā
āñtoñ kā dard niind kī pariyoñ ko khā gayā

maut ke aate hī ham ko ḳhud-baḳhud niind aa ga.ī
kyā usī kī yaad meñ karte the shab-bedāriyāñ

shā.ir huuñ gahrī niiñd meñ haiñ jo haqīqateñ
chauñkā rahe haiñ un ko bhī mere tavahhumāt

kyā niiñd aa.e us ko jise jāgnā na aa.e
jo din ko din kare vo kare raat ko bhī raat