Tags-Neend

chheḌo na mīThī niiñd meñ ai munkar-o-nakīr
sone do bhaa.ī maiñ thakā-māñda huuñ raah kā

rafta rafta manzar-e-shab taab bhī aa jā.eñge
niiñd to aa jaa.e pahle ḳhvāb bhī aa jā.eñge

niiñd āñkhoñ meñ is liye aa.ī
un ke aane kī kab bashārat ho

mere chāragaro mere tan-parvaro, jaao tum kas liye niiñd khoTī karo
hijr kī raat lā-intihā raat hai ye qayāmat nahīñ jo guzar jā.egī

kuchh niiñd se bojhal thiiñ tire shahr kī āñkheñ
kuchh merī kahānī meñ bhī vo rabt nahīñ thā

merī palkoñ par mire ḳhvāboñ kī kircheñ rah ga.iiñ
niiñd ghāyal ho ga.ī āñkhoñ meñ sonā ho gayā

aatī nahīñ hai niiñd mujhe is liye bhī dost
āñkhoñ kī putliyoñ meñ hazāroñ jhaḌe haiñ ḳhvāb

āñkhoñ ke iztirāb se aise jhaḌe haiñ ḳhvāb
shab ke shajar pe niiñd kī sūrat paḌe haiñ ḳhvāb

jab bhī chalā huuñ niiñd ke raste pe yuuñ lagā
hāthoñ ko joḌ kar mire aage khaḌe haiñ ḳhvāb

jheñp jaatā hai chaTaktī huī kaliyoñ kā shabāb
mast āñkhoñ meñ agar niiñd bharī hotī hai

niiñd jab ḳhvāb ko pukārtī hai
raat apnā libās utārtī hai

mash.hūr hai ki suulī pe bhī niiñd aatī hai
yā-rab shab-e-firāq meñ kyūñkar ke soiye

niiñd aa.egī bhalā kaise use shaam ke ba.ad
roTiyāñ bhī na mayassar hoñ jise kaam ke ba.ad

chauñkā diyā qafas ne hameñ gahrī niind se
vābasta ho chale the bahut āshiyāñ se ham

raat kyā so.e ki baaqī umr kī niiñd uḌ ga.ī
ḳhvāb kyā dekhā ki dhaḌkā lag gayā tābīr kā

raat mere fuġhāñ-o-nāle se
saarī bastī na niiñd bhar soī

ūñchī ūñchī shahnā.ī hai
pāgal ko niiñd aa.ī hai

vo aise log the jo
dasht-e-be-dīvār meñ apne safar kā niiñd se āġhāz karte the

ma.alūm nahīñ niiñd kise kahte haiñ lekin
kartā to huuñ ik kaam maiñ sone kī tarah kā

ḳhud samundar kī niiñd TuuT ga.ī
raat kuchh yuuñ Dhalī samundar meñ