Tags-Neend

is tarah aatā huuñ bāzāroñ ke beach
jaise niiñd aa jaa.e bedāroñ ke beach

yaad jis kī hameñ sone nahīñ detī aksar
us sitamgar kī bhī ab niiñd churā lī jaa.e

sāmne hai niiñd kī lambī masāfat aaj shab
kārvān-e-anjum-o-mahtāb bhī chalne ko hai

kyā aa ga.ī niiñd ahl-e-mahfil
kahnī thī hameñ bhī ik kahānī

mire sāz-e-nafas kī ḳhāmushī par ruuh kahtī hai
na aa.ī mujh ko niind aur so gayā afsāna-ḳhvāñ merā

tumhārī aañkh meñ kaifiyyat-e-ḳhumār to hai
sharāb kā na sahī niiñd kā asar hī sahī

niiñd aatī hai magar ḳhvāb nahīñ aate haiñ
mujh se milne mire ahbāb nahīñ aate haiñ

niiñd aa.ī hī nahīñ ham ko na pūchho kab se
aañkh lagtī hī nahīñ dil hai lagāyā jab se

na-jāne kab se tirā intizār hai mujh ko
ki niiñd toḌ ke be-ḳhvāb rāstoñ meñ aa

niiñd kī komal fasīleñ āñdhiyoñ meñ bah ga.iiñ
maiñ ne apne ḳhvāb kī lāshoñ ko Dhoyā raat bhar

niiñd ke sahrā meñ paanī kī tarah gum ho gayā
maiñ ne us ko ḳhvāb meñ har samt DhūñDā raat bhar

Tiis purāne zaḳhmoñ kī thī niiñd uchaT ga.ī āñkhoñ se
bhiig rahā thā karvaT karvaT gosha gosha bālish kā

gaurayyoñ ne jashn manāyā mere āñgan bārish kā
baiThe baiThe aa ga.ī niiñd isrār thā ye kisī ḳhvāhish kā

niiñd se jaage haiñ koī ḳhvāb bhī dekhā hai kyā
dekhā hai to boliye shab-bhar kahāñ kī sair kī

kab talak ḳhuun rulāte hue manzar dekhe
niiñd ko aañkh zarā der ko ab māñge hai

ḳhayāl un ko na hotā agar mohabbat kā
kabhī vo niiñd meñ chalte na rat-jagā karte

āñkhoñ meñ jāgtī hī rahī niiñd raat bhar
chaltī rahī ḳhayāl ke sahrā meñ garm lū

badalte mausam kī silvaToñ meñ dabī haiñ hijrat kī dāstāneñ
vo dāstāneñ jo sunñe vāloñ kī niiñd kab kī uḌā chukī haiñ

āñkheñ niiñd se kyuuñ haiñ bojhal
ġham kā nasha kuchh TuuT rahā hai

shab-e-firāq mujhe niiñd jab nahīñ aatī
ye kis kā haath mirā sar thapakne lagtā hai