Tags-Neend

abhī to karb hai be-chainiyāñ haiñ be-qarārī hai
tabī.at kuchh sambhal jaa.e to shāyad niiñd aa jaa.e

zarā sī raat Dhal jaa.e to shāyad niiñd aa jaa.e
zarā sā dil bahal jaa.e to shāyad niiñd aa jaa.e

ye hañstā muskurātā qāfila jo chāñd tāroñ kā
'farah' aage nikal jaa.e to shāyad niiñd aa jaa.e

ye tūfāñ āñsuoñ kā jo umaD aayā hai palkoñ tak
kisī sūrat ye Tal jaa.e to shāyad niiñd aa jaa.e

ai nāla-e-jāñ-kāh bahut ho chukī bas kar
Dartā huuñ kahīñ niiñd kisī kī na uchaT jaa.e

niiñd se uThtā hai 'tābāñ' jab mirā ḳhurshīd-rū
dekh us ke muñh ke ta.iiñ sharmā ke chhup jaatī hai sub.h

āñkhoñ se pare niiñd kī raftār meñ rahnā
har pal kisī nā-dīd ke dīdār meñ rahnā

ab koī ḳhvāb na āñkhoñ meñ tasavvur hai 'bashar'
varna āñkhoñ meñ mirī niiñd kahāñ rahtī thī

utārtā hai mujhe niind ke niastāñ meñ
abhī vo ḳhvāb rag-e-tāk se nikaltā hai

niiñd āñkhoñ hī āñkhoñ meñ kaTtī ga.ī pau bhī phaTtī ga.ī
yaad karte rahe par pukārā nahīñ vo hamārā nahīñ

ab kuchh nahīñ to niiñd se āñkheñ jalā.eñ ham
aao ki jashn-e-marg-e-mohabbat manā.eñ ham!

chubh rahe haiñ aañkh meñ ḳhvāb-e-pareshāñ raft ke
jism hai is niiñd ke bistar se uktāyā huā

kisī aañkh meñ niiñd aa.e to jānūñ
mirā qissa-e-ġham kahānī nahīñ hai

agar ye sard-mehrī tuj ko āsā.ish na sikhlātī
to kyūñkar āftāb-e-husn kī garmī meñ niind aatī

hinā tere kaf-e-pā ko na us shoḳhī se sahlātī
ye āñkheñ kyuuñ lahū rotīñ unhoñ kī niind kyuuñ jaatī

ḳhvāboñ kī lazzatoñ pe thakan kā ġhilāf thā
āñkheñ lagīñ to niiñd kā maidān saaf thā

judā judā rahā hai kyā faqīr raah niiñd meñ
ki zindagī ke bhaav par na ab uchhāl aa.egā

hasrat Tahnī Tahnī niiñd meñ Duubī thī
bikhre the peḌoñ ke pīchhe ḳhvāb hī ḳhvāb

mai hai terī āñkhoñ meñ aur mujh pe nasha sā taarī hai
niiñd hai terī palkoñ meñ aur ḳhvāb mujhe dikhlā.e hai

sunā hai niiñd meñ vo chauñk chauñk paḌte haiñ
lahū ke daaġh the jin par vo haath jalte haiñ