Tags-Neend

ḳhvāboñ ke shauq meñ kahīñ āñkheñ gañvā na deñ
ham so rahe haiñ niiñd na aane ke bāvajūd

kaalī billī ne ye bhī nahīñ sochā ki maiñ kisī niiñd meñ ḳhalal ho rahī huuñ
us ko to chūhoñ se matlab hai

khultī nahīñ hai yā rab kyuuñ niiñd raftagāñ kī
kyā hashr tak ye aalam soyā paḌā rahegā

din ke paikar meñ kahīñ raat meñ Dhalte hue rañg
jaane rukte haiñ kahāñ niiñd meñ chalte hue rañg

sub.h-dam ghar se nikalnā hī agar paḌ jaa.e
niiñd se aañkh churātā huuñ masalte hue rañg

raat to gahrī niiñd sotī hai
sāz-e-ġham subah ko sunāne de

sher kyā hai niim bedārī meñ bahnā mauj kā
barg-e-gul par niiñd meñ shabnam ke girne kī sadā

tū āñhkeñ muuñd le to niiñd aa.e mujh ko bhī
tū jāntā hai ki yuuñ so nahīñ sakūñgā maiñ

varna to niiñd se bhī nahīñ koī ḳhaas rabt
āñkhoñ ko sirf aap ke ḳhvāboñ kā shauq hai

niiñd aa.ī hai fasāna-e-gesū-o-zulf se
vahm-o-gumān-e-ḳhvāb-e-pareshāñ nahīñ rahā

mulāqāteñ to hotī haiñ magar puurī nahīñ hotī
ki jaise niiñd meñ gahrī adhūrā ḳhvāb aayā ho

niiñd un kī yuuñ uḌī hai ki aatī nahīñ kabhī
marne ke ba.ad ab mirā nāla-rasā huā

ḳhvāb-lamha tirī ḳhushbū meñ basā thā pahle
be-ḳhabar niiñd meñ ik phuul khilā thā pahle

niiñd kā panchhī aa pahuñchā hai vahshī dil kī baat na sun
mil bhī ga.e to āḳhir thak kar gahrī niiñd hī sonā hai

un kī āñkhoñ ko kahāñ ḳhvāb mayassar hote
niiñd bhar bhī jo kabhī so na sake haiñ ab tak

hijr kā sannāTā kho degī gahmā-gahmī nāloñ kī
raat akele kyūñkar kāTeñ sab kī niiñd harām kareñ

ḳhvāb kī khiḌkī se us ko dekhnā achchhā lagā
niiñd ke āñgan meñ shab-bhar jāgnā achchhā lagā

binā tumhāre na jī sakeñge
vo niiñd meñ budbudā rahā thā

aa ga.ī niiñd use bhuul bhī jā.egā 'asīr'
aa gayā sabr mujhe zaḳhm bhī bhar jā.eñge

yahī qismat hai un ke ḳhvāb se rahnā nadārat
maiñ jaagā huuñ, maiñ jin kī niiñd meñ takiya banā huuñ