Tags-Neend

terī āñkhoñ meñ abhī niiñd ke Dore kyuuñ haiñ
yaañ to ik choT se ho jaate haiñ biinā patthar

niiñd furqat meñ kahāñ maut se aane vaalī
ghar se behtar hai jo takiye meñ ho bistar apnā

phir bistar se uThne kī bhī mohlat kab miltī hai 'ādil'
niiñd meñ aatī haiñ āvāzeñ ḳhvāb meñ lashkar aa jaate haiñ

palak fasāna sharārat hijāb tiir duā
tamannā niiñd ishāra ḳhumār saḳht thakī

us raat bhī niiñd agar na aa.ī
jis raat pe is qadar fidā ho

ḳhvāb meñ donoñ ne dekhī raushnī
niiñd meñ mil baañT kar DhūñDā charāġh

niilī āñkhoñ kī kar rahā thā maiñ
jab tilāvat to jal ga.ī thī niiñd

kis ne chheḌā havā ke lahje meñ
kaisī ḳhāmosh sī paḌī thī niiñd

merī āñkhoñ ke kyuuñ jharoke tak
aa ke chup-chāp sī khaḌī thī niiñd

jab talak maiñ kivāḌ kartā band
'sājid' mujh duur jā chukī thī niiñd

aañkh se TuuT kar girī thī niiñd
vo jo mad.hosh ho chukī thī niiñd

chāñd mere sirhāne baiThā thā
aur baġhal meñ khaḌī huī thī niiñd

kitnī pur-lutf thiiñ mirī rāteñ
un dinoñ jab harī-bharī thī niiñd

yā hameñ zulf ke saa.e hī meñ niiñd aatī thī
yā mayassar kisī dīvār kā saayā bhī nahīñ

umr saarī vo niiñd meñ bolā
chand lamhoñ ko koī jaagā thā

niiñd aa.ī na khulā raat kā bistar mujh se
guftugū kartā rahā chāñd barābar mujh se

niiñd meñ chauñk paḌegā koī
aao us dar pe sadā dī jaa.e

muztarib Thahre so shab meñ der se aatī hai niiñd
sub.h se pahle magar bedār ho jaate haiñ ham

merī āñkheñ niiñd se bojhal huiiñ
jab nazar aayā koī bistar khulā

tire āsmāñ se azaab kyuuñ nahīñ TūTtā
mirī niiñd aur mirā ḳhvāb kyuuñ nahīñ TūTtā