Tags-Neend

jab se chhīnī hai tirī yaad ne niiñd ā.ankhoñ kī
dil kī jo his hai vo bedār huī jaatī hai

niiñd laatā huā phir aañkh ko dukh detā huā
tajrabe donoñ haiñ vābasta tire haat ke saath

aarsī suuñ ab sharāb-e-nāb khīñchā chāhiye
niiñd suuñ uTh yaar ne dekhā hai chashm-e-nīm-ḳhvāb

ujlī ujlī ḳhvāhishoñ par niiñd kī chādar na Daal
yaad ke rauzan se kuchh taaza havā bhī aa.egī

sochā thā ab maut sī niiñd maiñ so.ūñgā
ḳhvāb meñ kuchh nāyāb dikhā so zinda huuñ

na-jāne kaisī nigāhoñ se maut ne dekhā
huī hai niiñd se bedār zindagī ki maiñ huuñ

niiñd ke kamre meñ dam ghuTne lagā
ḳhvāb kī khiḌkī ko kholā chāhiye

aap se mil ke gale rāhat se aa jaatī hai niiñd
sabza-e-ḳhvābīda hai poshāk dhānī aap kī

mānūs haiñ ġham se kuchh aise gar niiñd meñ bhī ham ne 'arshad'
apne ko hañste dekh liyā to dekhte hī Dar jaate haiñ

un kī palkoñ se gire TuuT ke kuchh tāj-mahal
niind se chauñk ke jab dīda-e-tar kholā hai

jinheñ sahar nigal ga.ii, vo ḳhvāb DhūñDhtā huuñ maiñ
kahāñ ga.ī vo niiñd kii, sharāb DhūñDhtā huuñ maiñ

hai niiñd abhī aañkh meñ pal bhar meñ nahīñ hai
karvaT koī ārām kī bistar meñ nahīñ hai

sotī haiñ is meñ kitnī umīdeñ fanā kī niiñd
siina hai ek shahr-e-ḳhamoshāñ tire baġhair

aañkh meñ maut ke kaale kaale aañsū haiñ
ḳhvāb meñ niiñd ko gahrā hote dekhā hai

fasāna-ḳhvāñ dekhnā shab-e-zindagī kā anjām to nahīñ hai
ki sham.a ke saath rafta rafta mujhe bhī kuchh niiñd aa rahī hai

dil divāna ho gayā hai dekh ye sub.h-e-bahār
rasmasā phūloñ basā aayā añkhoñ meñ niiñd hai

umr-bhar kam-baḳht ko phir niiñd aa saktī nahīñ
jis kī āñkhoñ par tirī zulfeñ pareshāñ ho ga.iiñ

niiñd ke naam se jo Dartā hai
saañp ḳhvāboñ meñ dekhtā hogā

ḳhvāb-dar-ḳhvāb tujhe DhūñDne vāloñ ne bhī ab
niiñd ko dīda-e-namnāk se bāhar rakkhā

maiñ huā bedār to har shaḳhs ye kahne lagā
niiñd meñ huuñ ḳhvāb meñ huuñ yā kisī ġhaflat meñ huuñ