Tags-Neend

ḳhvāb meñ jāgtī be-ḳhvābī patā pūchhtī hai
kyā kaheñ niiñd bhī hotī hai sulāne vaalī

isī liye to mujhe niiñd hī nahīñ aatī
tamām raat koī ḳhat khulā chamaktā hai

jagā rahā hai zamāna magar nahīñ khultīñ
kahāñ kī niiñd in āñkhoñ meñ aa ke baiTh ga.ī

niiñd āñkhoñ meñ rahe phir bhī na soyā jaa.e
maiñ vo patthar huuñ ki ro.uuñ to na royā jaa.e

niiñd TuuTī hai kis kī aahaT se
sat.h-e-dil par koī to chaltā hai

niiñd aatī hai is tarah shab ko
jaise piine meñ nashsha chaḌhtā hai

phir na lauTegī mirī ā.ankhoñ meñ
niiñd rañgoñ sī uḌā chāhtī hai

tū niind meñ bhī merī taraf dekh rahā thā
sone na diyā mujh ko siyah-chashmi-e-shab ne

ham-nashīñ kyā kahūñ ki vo kyā hai
chhoḌ ye baat niiñd uḌne lagī

ḳhaak niind aa.e agar dīda-e-bedār mile
is ḳharābe meñ kahāñ ḳhvāb ke āsār mile

kājal bhī niiñd kā mirī āñkhoñ se le uḌā
ḳhvāboñ meñ aa ke vo mujhe be-ḳhvāb kar gayā

kal raat jagātī rahī ik ḳhvāb kī duurī
aur niiñd bichhātī rahī bistar mire aage

kunj-e-lahad meñ mujh ko sulā ke pūchhte haiñ vo logoñ se
niiñd unheñ ab aa ga.ī kyūñ-kar kyā huī jo bad-ḳhvābī kī

kuchh dinoñ kī baat ho to kaaT deñ āñkhoñ meñ raat
niiñd agar aa.e na 'farruḳh' umr bhar kaise kareñ

tū yuuñ hī pashemāñ hai sabab tū nahīñ is kā
niiñd aatī nahīñ ham ko kisī ḳhvāb ke Dar se

jab unheñ niiñd panāheñ nahīñ detī haiñ 'asad'
ḳhvāb phir jāgtī āñkhoñ se lipaT jaate haiñ

kahīñ se aatī hī jaatī hai niind āñkhoñ meñ
kisī ke aane kī saa.at nikaltī jaatī hai

bin tumhāre kabhī nahīñ aa.ī
kyā mirī niiñd bhī tumhārī hai

atash kī niiñd bahut baḌh ga.ī hai āñkhoñ meñ
chalo furāt kī bāhoñ meñ so ke dekhte haiñ

niiñd meñ kyā kyā dekheñ, taḌpeñ, ro.eñ, uTh uTh jaa.eñ
so jaane kī golī khā.eñ, injection lagvā.eñ