Tags-Nigaah

gardan jhukī huī hai uThāte nahīñ haiñ sar
Dar hai unheñ nigāh laḌegī nigāh se

us kā āshiq huā huuñ jis kī 'vaqār'
chashm aahū nigāh aahū hai

maiñ pesh-rau huuñ isī ḳhaak se ugeñge charāġh
nigāh-o-dil ke ufuq ko ujālne ke liye

jo ġham nasīb-e-yār ho ḳhud apnī ziist par
kab tak nigāh-e-nāz kā vo aasrā kare

baiThne ko shāḳh-e-tūbā par nahīñ kartīñ nigāh
is chaman kī bulbuloñ kā āshiyāñ hī aur hai

vo apne dāman-e-pāra pe bhī nigāh kare
jahāñ meñ mujh pe uThā kar jo uñgliyāñ guzre

dil-e-fasurda ko ab tāqat-e-qarār nahīñ
nigāh-e-shauq ko ab tāb-e-intizār nahīñ

adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

itnā sochā tujhe ki duniyā ko
ham ne terī nigāh se dekhā

nigāh-e-mast se ojhal haiñ manzileñ dil kī
haiñ apnī āḳhirī sāñsoñ pe chāhateñ dil kī

mahfil meñ kis ko tāb-e-huzūr-e-jamāl thī
aa.e tirī nigāh ke maare chale ga.e

do-chār din nigāh kā markaz rahā koī
phir fāsloñ kā faisla karnā paḌā mujhe

kaḌī nigāh rakhegā vo sīm-tan mujh par
ki mehrbāñ hai kisī phuul kā badan mujh par

shukr hai is nigāh-e-kam kā miyāñ
pahle hī ham khaTak ga.e hoñge

nigāh Daal dī jis par vo ho gayā andhā
nazar ne rañg-e-tasarruf dikhā.e haiñ kyā kyā

asīr-e-ḳhāk mujhe kar ke tū nihāl sahī
nigāh Daal ke to dekh zer-e-dām hai kyā

dil ban gayā nigāh nigah ban ga.ī zabāñ
aaj ik sukūt-e-shauq qayāmat hī Dhā gayā

ye ahd-e-ġham kī nahīñ hikāyat thī is se pahle bhī aisī hālat
vahīñ pe Thahrī nigāh-e-ulfat jo rañg dekhā shikastagī kā

aam alfāz meñ poshīda ma.ānī kī taheñ
har nigāh-e-ġhalat-andāz liye raaz kā rañg

kalīm-e-tūr ye kyuuñ tuur par girī bijlī
nigāh-e-nāz ko kyā koī bā-vafā na milā