Tags-Nigaah

nigāh-e-sāqī-e-rā.anā kā ye bhī ehsāñ hai
ba-qadr-e-zauq mai-e-āgahī nahīñ miltī

sar-e-niyāz jhukā.egā kyā koī ḳhuddār
nigāh-e-nāz se jab daad hī nahīñ miltī

nigāh-e-ishq meñ tābindagī nahīñ miltī
charāġh-e-husn se ab raushnī nahīñ miltī

ham ko rusvā kar ke rusvā.ī se bachnā hai muhāl
tū bhī tash.hīr ai nigāh-e-fitna-gar hone ko hai

nigāh-e-muztarib phir DhūñDtī hai kis ko har shai meñ
zamīn apnī aziiz apne ḳhudā-e-do-jahāñ apnā

ye haiñ daar terī nigāh ke kisī nā-tavāñ se rukeñge kyā
dil-e-dāġh dāġh-e-'azīz' hai sitam-āzmā ye sipar nahīñ

dekho phir aise dekhne vaale na pāoge
kyuuñ ḳhaak meñ milāte ho nīchī nigāh se

jhapkī palak tū barq falak se zamīñ pe thī
sambhlā na koī gir ke tumhārī nigāh se

ab kaun phir ke jaa.e tirī jalva-gāh se
o shoḳh chashm phūñk de barq-e-nigāh se

ā.īne aarsī to faqat dekhne ke haiñ
dekho tum apne husn ko merī nigāh se

mirī nigāh meñ hai vo harīm-e-zebā.ī
kanīz ban ke jahāñ mariyam-e-bahār rahe

nigāh-e-barq alāva mire nasheman ke
chaman kī aur kisī shāḳh par nahīñ hotī

na ho rihā.ī qafas se agar nahīñ hotī
nigāh-e-shauq to be-bāl-o-par nahīñ hotī

tumhārī ik nigāh-e-nāz ke sadqe meñ ai jānāñ
hue haiñ ḳham na jaane kitne hī sardār chuTkī meñ

kabhū jo ālam-e-mastī meñ tum ne kī thī nigāh
bajā.e aab bahe hai sharāb dariyā meñ

abhī is taraf na nigāh kar maiñ ġhazal kī palkeñ sañvār luuñ
mirā lafz lafz ho ā.īna tujhe aa.ine meñ utaar luuñ

parde kuchh aise rū-ba-rū āñkhoñ ke aa ga.e
duniyā mirī nigāh meñ andher ho ga.ī

dil par rakho nigāh jigar par nazar karo
maqdūr ho to zaat meñ apnī safar karo

rag-e-gul par hai kabhī aur kabhī ġhunche pe nigāh
baaġh meñ kis kī kamar kis kā dahan yaad aayā

jahāñ bhī dekhā vahīñ paayā tujh ko jān-e-visāl
tirī nigāh kā partav kahāñ kahāñ na milā