Tags-Nigaah

mirī nigāh meñ jalve tire simaT aa.eñ
jahāñ maiñ jā.ūñ vahīñ tū hī tū dikhā.ī de

har āh-e-sard ishq hai har vaah ishq hai
hotī hai jo bhī jur.at-e-nigāh ishq hai

na ho rihā.ī qafas se agar nahīñ hotī
nigāh-e-shauq to be-bāl-o-par nahīñ hotī

har ik nigāh be-maqām be-jahat
har ek jism be-dayār shahr meñ

mujhe gardish meñ rakhtī hai nigāh-e-dil-sitāñ kyā-kyā
mirī qismat dikhātī hai mujhe nairañgiyāñ kyā-kyā

us nigāh-e-nāz ne yuuñ rāt-bhar tajsīm kī
sab charāġhoñ meñ barābar raushnī taqsīm kī

ḳhafā hai gar ye ḳhudā.ī to fikr hī kyā hai
tirī nigāh salāmat mujhe kamī kyā hai

dil-kushā thī nigāh-e-nāz us kī
tiir kyuuñ us kā dil-kushā na huā

ba-ehtiyāt hamārī taraf uThī hai nigāh
laboñ pe mauj-e-tabassum sambhal ke aa.ī hai

mirī nigāh-e-tamannā kā aks ho na 'shamīm'
kisī ke ruḳh pe jo surḳhī machal ke aa.ī hai

vo ḳhamīda-qad ḳham-e-māh--enau vo nazar-fareb ḳhunuk sī zau
vo nigāh-e-barq-e-amal kī rau ki diloñ ko jis ne hilā diyā

rok nigāh-e-hirs ko maalī
tere chaman ko charne na paa.e

vo lauT aayā hai yā merī ḳhud-farebī hai
nigāh kahtī hai dekhe use zamāna huā

tālib koī hai ek karam kī nigāh kā
kiije na rad kisī kā ye pahlā savāl hai

kah rahī hai nigāh-e-duz-dīda
ruḳh badalne ko hai zamāne kā

palkeñ nahīñ chhoḌtīñ ki ik dam
āñkhoñ se tirī nigāh nikle

phir ek baar mirī ahmiyat ko lauTā de
tirī nigāh ko phir mehrbān chāhtā huuñ

nigāh o dil ke paas ho vo merā āshnā rahe
havas hai yā ki ishq hai ye kaun sochtā rahe

hai ye taqdīr kī ḳhūbī ki nigāh-e-mushtāq
pardā ban jaa.e agar parda-nashīñ tak pahuñche

na sham-e-dil na sham.a-e-ruḳh nujūm-e-shab na māh-e-shab
nigāh-o-dil dhuāñ dhuāñ ye shaam bhī kahāñ huī