Tags-Nigaah

ab bandish-e-nigāh kī qīmat bahut baḌhī
logoñ ne jā ke apnī hī bīnā.ī bech dī

nigāh-e-bad kā andesha hai mujh ko
vo baiThe haiñ jabīñ par til banā kar

uThtī nahīñ hai ham pe koī mehrbāñ nigāh
kahne ko shahr mahfil-e-aġhyār bhī nahīñ

'jalīl' is baaġh meñ kāñTe kī sūrat
khaTaktā hai nigāh-e-bāġhbāñ meñ

jab tak mirī nigāh meñ terā jamāl hai
ai dost merā hosh meñ aanā muhāl hai

mirī nigāh meñ jiinā sharaf se marnā hai
tirī nigāh meñ ye sab harām hai shāyad

zabān kyā hai mohabbat kī guftugū kyā hai
ba-juz nigāh ke paiġhām-e-ārzū kyā hai

nigāh-e-ishq o mastī meñ vahī avval vahī āḳhir
vahī qur.āñ vahī furqāñ vahī yāsīñ vahī taahā

tujhe pasand kahāñ haal pūchhnā merā
tirī nigāh meñ lekin savāl sā kyā hai

na vo yaad hai na vo hijr hai na nigāh-e-nāz kā zikr hai
mire zehn se tirī fikr ke sabhī rozgār chale ga.e

banā.e zinda-e-jāved yā rakhe 'bedam'
mire sar āñkhoñ pe jo kuchh nigāh-e-nāz kare

nigāh o dil meñ vahī karbalā kā manzar thā
maiñ tishna-lab thī mire sāmne samundar thā

vo jo log mere ḳhulūs kā baḌā barmalā sā javāz the
jo nigāh-e-nāz kā zo.am the maiñ unhī kā sarf-e-nazar rahā

tirā hī aks sarishk-e-ġham-e-zamāna meñ thā
nigāh meñ tirī tasvīr sī utar aa.ī

fazā ko jaise koī raag chīrtā jaa.e
tirī nigāh diloñ meñ yūñhī utar aa.ī

mez kī darāz se kuchh DhūñDte hue
nigāh kisī ke diye ga.e pen par paḌī

ik nigāh-e-ġhalat-andāz kā imkāñ niklā
kuchh zamīñ aur milī paañv baḌhāne ke liye

na aa.egā lab pe harf-e-matlab na khul sakegī zabān-e-'kaifī'
nigāh-e-hasrat ko tarjumāñ kar ḳhamoshiyoñ ko javāb kar de

vo neshtar sahī par dil meñ jab utar jaave
nigāh-e-nāz ko phir kyuuñ na āshnā kahiye

nazar milā na sake us se is nigāh ke ba.ad
vahī hai haal hamārā jo ho gunāh ke ba.ad