Tags-Nigaah

tirī taraf huī sūrat-garān-e-chīñ kī nigāh
qalam ko haath se rakh apnā kaam bhuul ga.e

vo be-niyāz-e-dard-o-ġham-e-zindagī 'niyāz'
vo log bā-farāġh haiñ merī nigāh se

saaqī kī chashm-e-mast pe ilzām aa na jaa.e
labrez sab ayāġh haiñ merī nigāh se

hai kis qadar hasīn ye tasvīr-e-kā.enāt
ḳhush-rañg bāġh-o-rāġh haiñ merī nigāh se

merī nazar shuā jigar-soz-o-jāñ-gudāz
raushan diloñ ke daaġh haiñ merī nigāh se

vīrāne baaġh baaġh haiñ merī nigāh se
zarrāt shab-e-charāġh haiñ merī nigāh se

sitam se dī tasallī us kamāñ-abrū ke qurbāñ huuñ
rag-e-jāñ kar diyā dil ko mire tīr-e-nigāh apnā

jidhar nigāh kī jalva tirā nazar aayā
kamāl-e-kashf mujhe terī aarzū se huā

ai nigāh-e-shauq tū dhokā na de
vo to hai hadd-e-nazar sāhil nahīñ

haañ vo nigāh-e-nāz bhī ab nahīñ mājrā-talab
ham ne bhī ab kī fasl meñ shor bapā nahīñ kiyā

majbūr ho chukī thī zabāñ arz-e-hāl par
lekin tirī nigāh ne ḳhāmosh kar diyā

qurbān us nigāh ke jis ne 'hamīd' ko
sad-mahshar-e-ḳhayāl dar-āġhosh kar diyā

tire ḳhayāl se hai masti-e-nazar merī
tirī nigāh se maiñ ne sharāb chhānī hai

ragoñ meñ ruuh hai aur ḳhuun meñ ravānī hai
nigāh bāda-kash o chehra arġhavānī hai

paḌī jis taraf ko nigāh yaañ nazar aa gayā hai ḳhudā hī vaañ
ye haiñ go ki āñkhoñ kī putliyāñ mire dil meñ jaa.e butāñ nahīñ

jhukī jhukī nigāh meñ hazār kaif-o-mastiyāñ
usī nigāh-e-nāz ko uThā uThā ke pī gayā

nasīhatoñ ke darmiyāñ jo tak rahī thī jaam ko
usī nigāh-e-bad se maiñ bachā bachā ke pī gayā

vo nigāh kaisī nigāh thī ki 'shamīm' se vo na chhup sake
ye adā bhī qābil-e-dīd hai jo mile to bach ke guzar ga.e

vahī nigāh ki jis se jahāñ laraztā hai
ham us nigāh ko rāz-e-hayāt kahte haiñ

mirī nigāh se vo dekhte rahe haiñ mujhe
rahā huuñ maiñ bhī kabhī us nigāh kā me.aar